الحاصل شنو في السفارة؟

Gawasma كتب:: عشان تعرف - يا أبو أشرقت - أن الوطن حقه دائما مهضوم ، لم يجد هذا الكلام ، على أهميته ، اهتماما من أحد

أتمنى مخلصا أن يتكفل أحد من الإخوة في السفارة بالتعليق على ما طرحه الأخ نزار من ملاحظات حول استقبال السفارة ، التي يترأس فريق الدبلوماسيين فيها ، الديبلوماسي المخضرم سعادة السفير إبراهيم مرغني الذي أثبت أنه رجل من الطراز الرفيع ومن خيرة الرجال الذين يمكن أن يمثلوا السودان في الخارج

استقبال السفارة ( أي استقبال سفارة في أي بلد ) والذي لا تتعدى حدودة 20×20م2 على اقل تقدير هو يمثل الوطن ( أي وطن ) حتى وإن كانت مساحته مليون ميل مربع وعدد سكانه 40 مليون

بوستك لم يستنفد غرضه بعد يا صديقي ...

تحياتي ومودتي ..

الأخ العزيز قواسمة ، ليك التحايا

تعرف ، ما كنتَ راجع للبوست ده تاني ، لكن عزّ عليّ إنك تداخلتَ فيه بعد غيبتك الطويلة ، فلازم نرد عليك التحية يا صاح .. مع إنو رجوعي ده شايفو زي ونسة أمهاتنا قدام الباب لمـّن يجنـّهن ضيوف . يكونن بتونسن ساعة جوة ، وما يحلا الكلام إلا في خواتيم الوداع.

وهسة شوف مداخلتك دي ليها كم يوم؟ والبوست في رقبتو ليو كم يوم؟ هل في زول قال لينا بتهببوا في شنو؟
عادي جداً (على قول أحمد شاويش) .. فـ نحن لا شيء في قاموس هؤلاء الأقوام.
لكن أبشرك (قرقرقرقر) : قالوا جابوا ليهم تلاجة موية صغيرة ختوها للناس في الرسيبشن . عقبال الشاي ، وياله من كرم.

ودالشريف كتب:: في نقطة مهمة وحساسة ذكرها العزيز نزار و أشار إليها الأخ العزيز قواسمة في مداخلته، أرجوا أن نقيف عندها لأنها و في إعتقادي إنها بتهمنا كلنا مسألة الضيافة لبلد أتصف أهله بالكرم و الجود ، معك أخي قواسمة في أن يتكفل أحد الأخوة بالسفارة بالرد ،

يا ود الشريف يا عزيز ..

لم يتكفل أحد من السفارة (ولن يتكفل) بالتعليق . وعن نفسي ، لم يكن في وارد أمنياتي حين كتبتُ هذا البوست ، أن يرد أحدٌ منهم عليه.
بعدين يا ود الشريف حكاية الكرم والجود و(حتى الطير يجيها جعان ومن أطراف تقيها شبع) دي بقت جاكات شعراء وفنانين ساي . مواد للكتابة ، يخلقها الكاتب من الفراغ ليتكسـّب بها .. زي حكاية الشاعر الـ قال (أمهــّد ليك ، تتخلص منّي) ، أها عليك الله ده ما زول فارغ! يخلق في الاعذار للمحبوب عشان ياخد شاكوش ، ويمشي يتباكى بالأشعار ويبني مجدو كـ مشوكش مسكين! وغنا الشعرا والفنانين ده فيهو مـِـحـَـن ، خلينا نكتبها في براح تاني.
المهم ، صالة الاستقبال الوسيعة حولوها لمعرض منتجات تابع للملحقية الاقتصادية ، تقريبا.. وتم الاكتفاء بالاوضة الصغيرة كـ ريسيبشن حشروا فيهو موظف الاستقبال وأي زول عندو معاملة ، بلا خدمات ولا كرم ولا هم يحزنون ، ولا هم يفرحون. في حين كان أولى لهم استئجار مبنى أوسع ليكون سفارة تليق بـ (بلد الكرم والجود) . الجماعة يرشدّون النفقات في الحاجات المهمة الـ ممكن تعكس وجه البلد بصورة أفضل ، ويبهلوها في الفارغات زي تسيير النفرات الكبرى والصغرى من أجل قضية حلها لا يأتي من ممارسات كهذه. وديل ينطبق عليهم قول حمـّـيد في وصف النميري (زولك ده يحيــّـر / ساعة الجـّد إنْ أد ّ ينقنق / ووكت الفارغة يشيل ويبعزق( .. أو قوله له : ( الناس عوجات ، تحرس ، ترجا / ترجعبو سلاح ، وأنوار زينة..) .. كانوا راجيين النميري يجيب ليهم الأدوية والبذور المحسنة من بلاد برّة، جاهم شايل فواتير أسلحة و.. أنوار للقصر الجمهوري ...
وآآهـ يا بلد . رحمة الله عليك.

مميز عدد الرسائل : 2317 تاريخ التسجيل : 10/10/2007

الأخ الحبيب نزار

غرنا من غيرتك ، على البلد أبو وشناً جميل

و بحمد الله الخطوات تتسارع من قبل السفارة لترضي ما كان من المفترض أن يكون ، الحمد الله و إنشاء الله ، نجد ما نصبروا ويصبوا إليه كل زول في الدنيا شايفنوا بريدوا ، و النقلة الجاية بقولوا نوعية و نتوسم خير ما القصة كلها لفتة نظر و كتر خيرك كتير ، وبرضي ليك المولى الموالي ،

إن شاء الله خير يا ود الشريف
وننتظر مع المنتظرين . ويقال إنو ح يتم استئجار مقر القنصلية السعودية السابق ليكون مقرا جديدا للسفارة السودانية . وليت هذا الأمر يتم .. فالمبنى واسع جداً ، ويحتاج لمواصلات داخلية لبعض كبار السن . غايتو أقلاها ناس السفارة ح يضمنو إنو أزهري ما ح ينط ليهم في الغشية والمشية ، إلا يجيب معاهو موتر سوزوكي ينقلو من الباب للمكاتب الداخلية ..
المهم ، زي ما قال الشاعر : يورينا الله زيادة الراتب

يبدو إنو البوست ده فيهو لغم صيني . كل ما أتفكفك منه ألقاهو مكنكش في العضم.
الـ جابني اليوم ، ما قرأته في موقع صوت السودانيين حيث كتب أحد الجهاليل هناك واسمه الطيب (سلامة الاسم، والله) قائلاً الآتي :

الكاتب هذا الموضوع ماعنده موضوع وانا اقول له الحاصل فيك شنو ملك مضلم كده ومليان كابه وحقد وتدور فى كل صغيره وكبيره وعاوز سبب بس عشان تكتب ويقولو عليك الزول ده كتب موضوع ضخم .
ليه كده ليه كان من الممكن ان تذهب الى اى احد فى السفاره وتبلقهم وجهة نظرك وتكون مقبوله منك وتكون فوق الراس بس انا عارف ليه ما بلقت احد فى السفارة
* عاوز تكتب ليك موضوع زى الصحفيين لمن يلقى ليه خبر ينفرد بيه لوحده
** اكيد ما عنده الشجاعه ويقدر يكلم احد من ناس السفاره يعنى ضعيف الشخصية انا بعرف ناس كتيره ضعفاء الشخصيه حتى لو عاوز يطلب شى من احد يكتب ليه ورقه .
انتهى كلام الجهلول الذي ـ كما تلاحظون ـ لا يفرّق بين الواو والامباز . واقول الامباز لأن مهنة الجهلول ذات صلة بتلك المادة التي تعلفها البهائم.
جهلول أفندي يقول إنني "زي الصحفيين لما يلقى ليه خبر" .. ياخي ما زي الصحفيين ، أنا صحفي عدييييل ، وهذه مهنة تجهلها أنت ويجهلها ذاك القابع في السفارة الذي أرسلك لتكتب هذه الشنائع. وهل تعتقد يا جهلول إنو الكلام مع زول في السفارة محتاج لشجاعة؟ دي بقى حاجة تحتاج ليها انت وكل الجهاليل الـ في مقاسك لأنكم تعتقدون أن أي موظف في السفارة حاجة كبيرة خالص ، تنكسون له الرؤوس وتتلعثمون حتى حين تحيونه بتحية الإسلام .. هو السودان متأخر بين الأمم من شوية؟ ما ياكم ديل المؤخرنو ومطلعين عينو بجهلكم وسخفكم ودهنستكم وطلبكم للواسطة ، حتى لما الواحد يكون بطالب بحق من حقوقو ،
هسة انت مفتكر إنو الصحفيين الـ في الدنيا ديل كلهم ما عندهم شجاعة ، موش؟ يعني الصحفي لما يلقى ليهو تقصير من مسؤول ، مفروض ما يكتب عن التقصير ده في جريدتو ، بل يتصل أو يمشي للمسؤول عديل ويقول ليهو يا حضرة المسؤول ياخي إنتو قصرتو في الحاجة الفلانية ديك؟؟ بس كده؟ ده فهمك يا جهلول؟
غايتو الـ سواها فينا بيل غيتس يخلصها منه رب العالمين . ورطنا في دنيا التكنولوجيا بجهاليل يخجــّلو الجهل ذاتو حين يوصفون به.
قلت لي " ابلقهم" وجهة نظري؟ "ابلقهم" يا جهلول!! بكتبوها بالقاف يا عبقري؟؟
ياخي انا كتبتَ الكتبتو ده لمصلحتك انتَ ومصلحة أي زول هنا عشان الناس تتساوى في التعامل معاها في السفارة . لكن نسوي شنو في مخ الامباز المسيطر عليك ده
قوم لف كده ، لعنة الله عليك وعلى الـ مرسلك يا جاهل

عدد الرسائل : 37 تاريخ التسجيل : 05/04/2009

عفارم عليك يانزو ريحتنى شديد . انا مريت على كلام الاخ الطيب امبارح واصابنى احباط شديد من اسلوبه فى التعليق على الموضوع ! وبرجع اقول ليك ديل ناس كسره وملاح ساكت بعدين الاخ دا كان وين ؟ الموضوع قديم كان مخيم ولا شنو؟ ..

يا نزار يا ولدي

دا الجهل يمشي على أربعة

وقاعد لكسير الثلج والدهنسة

كنت عايز أرد بكلام كثير

ولكن خسارة الواحد يضيع وقته مع

جنس هذه الاشكال

كن دائما بخير

مميز عدد الرسائل : 2317 تاريخ التسجيل : 10/10/2007

بالله في ملحسة قدر ده

عاتبتني أم أشرقت على عبارتي في وصف الجهلول الطيب بأنه "لا يفرق بين الواو والامباز لأن مهنته ذات صلة بتلك المادة التي تعلفها البهائم" .. وأشارت إلى أن ذلك يعتبر تعدياً مني على شريحة مهمة من أخوتنا السودانيين المشتغلين في هذه المهنة ، وعليه وجب تقديم الاعتذار إليهم مع الشرح بأنني لم أقصد الحط من قدرهم على الاطلاق ، فكل عمل شريف هو محل احترامي وتقديري . والإنسان ـ رجلا كان أم امرأة ـ لا يستجلب احترام الآخرين له إلا باحترامه لنفسه ولهم ، ذلك أن المهنة ليست مقياساً نهائياً لقدر الإنسان الذي يتأسس بأخلاقه ولطف معشره وعفاف لسانه
وأنتهز هذه السانحة وأؤكد على أن بالسفارة نفسها أناس تربطنا بهم وبغيرنا علاقات إنسانية جميلة وراقية ، تنبع من صفاتهم الأصيلة ومكارم أخلاقهم السودانية التي تعرفون . وهم محل احترامنا وتقديرنا التام.

أقول كل ذلك لإزالة أي التباس . والعاقبة عندكم في المسرات.
..
الأخوة الأعزاء ود الخبير
الأب كمبلاوي
وود الشريف
شفتو البلاوي الـ بتتحدف ، على قول المصاروة!
وزي ما قال كمبلاوي ، مفروض الواحد ما يضيع زمنو في الرد على الفارغة
قال لي " بلقهم" . "أبلقهم" كيف بس؟
بلقة تقوم ليك في نص راسك ، قول آمين

» الحاصل شنو ؟ مالكم يا جماعة !!
» كل قرين ؟؟؟ و لا ما كده يا السفارة
» مرحب بأركان السفارة
» لماذا تتجاهل السفارة مجلس الجالية الحالي؟
» بيان من رئيس الجالية أبو تلة الحسن حول الخلاف مع السفارة