الحاصل شنو في السفارة؟

في الزمن الزمين ، كنا حين نزور السفارة لإجراء معاملة ، وهي زيارات متباعدة وتحكمها الضرورات ، يستقبلنا الاستقبال بالبشاشة والوّد ، وبعد السلام عليه نطلع السلالم (تنقش تنقش تنقش) ونقعد في مكتب فلان الفلاني والشباب يجيبوا ليك القهوة والشاي وتكون معاملتك بهناك بجهزوا فيها .. وخلال اقل من ربع ساعة تاخد ورقك وسلام حباب ، تتخارج .

وإذا كمان عايز تنتظر في الاستقبال ذاتو فـ خير وبركة : الصالة وااااسعة . الشاي والموية يجوك في محلك ، والجرايد طازجة أكان سودانية أو كويتية والتلفزيون يلعلع ، شي هارموني وشي ساهور وشي نيل أزرق ، والداخل والمارق يسلم عليك أكان سفير أكان قنصل أكان سوّاق أكان زاير ساي .. وبعد شويتين تستلم معاملتك والناس تودعك بالابتسام والمطايبة السودانية المعروفة.

هسة الحاصل شنو في السفارة؟ الناس مالها مضلــّمة كده ومليانة كآبة؟ والبــُـخـُل ده جابوهو من وين؟

اليوم الصباح مشيت السفارة لتجديد جواز ما ظنيتو يستغرق أكتر من ربع ساعة ، مرقت من هناك بعد ساعة ونص ، عداً ونقداً في الإنتظار. موية زرقة ساي نبدد بيها السأم ، ما أدونا.

وأنا قاعد في الاستقبال ، الذي تمّ فصله فصلاً تاماً وبصورة ركيكة جعلته أقرب إلى غرفة معيشة بائسة منه إلى استقبال سفارة، جال في خاطري مشهد من مشاهد مسرحية المهرج الـ كتبها الشاعر السوري محمد الماغوط ومثلوها فرقة الأصدقاء: الضابط بيستجوب في "صقر قريش" الـ دخل البلد بدون أوراق ثبوتية ، بيقول ليهو : وين جواز سفرك؟ .. صقر قريش ماعارف يعني شنو جواز سفر لأنو في زمنو الحدود كانت لسة ما تمّ اختراعها. فـ بيقول للضابط : ومنذ متى يحتاج العربي إلى إذن وورقة ثبوتية لكي يتجول في مرابع العربان؟ فيرد الضابط بتهكم: انتَ قايلها فوضى زي زمنكم بتاع قفا نبكي ؟ الواحد فيكم يركب حصانو وبرطع برطع برطع الليل كلو لافي في الصحرا لا إحم لا دستور؟ تلقاهو ساكن في بغداد ومجكس في الرباط؟؟ لا ياخوي البلد دي فيها نظام ووووو....

أها أخوكم جاء الليلة وشاف "النظام" بعينو في السفارة:

الإستقبال غرفة ضيقة جدا . ما فيهو تلفزيون . انتهت لعلعة هارموني وساهور. ولا فيهو جرايد سودانية . والجرايد الكويتية بتارخ 27 مارس الفات ولغاية 3 أبريل ده. وما في صفوف ولا زحمة ، ومع ذلك استغرقت المعاملة (وهي مجرد تجديد جواز إبتعثوا من أجل إجراءاته ضابطي جوازات) أكثر من ساعة. وفوق ده وداك ، الناس كأبااااااااااانة وأخلاقا ما مرتـّبة. مع إنهم آخر ترطيبة لأنو دوام شغلهم 6 ساعات بس في اليوم وإجازتهم يومين في الاسبوع ، موش زينا نحنا الـ المسحوقين في دوام الأشغال الشاقة بتاع 5 ساعات صباح و4 مسا.

وللأمانة أقول إن الأخ حسن عبد الله (الترابي؟؟) موظف الاستقبال كان كالعهد به ، شاب خلوق يقدر الناس ويعاملهم بطيب ومودة. وكذلك الأخ سليمان الذي لا يستثني أحداً من سلامه الحار. إلا البـُـخـُـل حاصل، فلا شاي لا موية لا جريدة بتاريخ اليوم.

ليه؟ مالك يا سفارة؟ الحاصل عليك شنو؟

مميز عدد الرسائل : 2317 تاريخ التسجيل : 10/10/2007

الأخ الجميل نزار تحياتي

الحاصل شنو ؟؟؟

يازوووووووووووووول،،،

دي زي قصة

راح زمان كان ليك مكانة ... وكنته أقرب مني لي

الطيب عبد الله ما كباها جرسة ودموع ،،، و نحنا شكلنا كده ماشين في دربه يا الحبيب مالك جاي ترجع الماضي خلاص الماضي عده و راح .تزكر يوم الإجتماع يا أخي يوم الجمعة الفاتت دي لما الناس إتغرفيت و أشتهت ليها رشفة شاي ساكت كان تعدل الدماغ الخرب مع كترت النسيان ؟؟؟ ياخي الموية دي ريقنا نشف من كترت الكلام ،،، مافي ، يعني أخير ليك المرة الجاية كان جيت تجيب ترمستك و زمزمتك ،

أنا أشهد زمان الأجتماع تجي تلاقي بطول الموية دي ما تديك الدرب و ترامس الشاي المنعنع بوخها طارب ،،، كان الناس تتفنن في أنواع البسكويت البتجيبوا معاها ما الشاي كان مشجع .

يا زول حمدلله علي تجديد الجواز ،،، و أعمل حسابك ما يسحروك ؟

عدد الرسائل : 37 تاريخ التسجيل : 05/04/2009

الاخ العزيز والراقى نزار تحياتى واشواقى لشخصكم الكريم اسمح لى اخش فيك شمال شويه بالنسبه للسفاره وحاله البؤس الضاربه فيها وتبعتها من بخل وعدم اكتراث من الاخوه المهمين فى السفاره دى حاصله لاكين اسمح لى وانا اخر من تتصور انو عندى علاقه بالموضوع اقول ليك حكايه الجواز دى والزمن الطويل التمت فيه عمليه التجديد عمليه سوء طالع بس ليها مبررات انت لوعرفتها انامتاكد انك حاتقبل بيها بصدر رحب بعدين الجماعه يدوب قالوا يارحمن يارحيم مافى داعى لشيل الحال حقو كان تسمع شكوى تانيه من اى شخص اخر بعدين تعقب على المساله دى ولك من فائق الاحترام والتقدير اخوك الجديد القديم ودالخبير

الأخ العزيز ود الشريف
الله يحسن لعوان ، زي ما بقولو المغاربة
عارف، حكاية الموية الـ مافي دي ذكرتني قصة صاحبنا المسافر على متن سودانير .. قال ليك زولنا ده بعد ما ربط حزامو والطيارة بدت تتمشى في المدرج قال للمضيفة : لو سمحتي يا أخت .. عليك الله موية ياخ. المضيفة اتلفتت عليو وقالت ليو بنهرة : بالله ما تفتح لي موضوع زي ده يا دوب قلنا بسم الله، هسة ديل كلهم يقولو عايزين يشربو..
فـ الواضح إنو الزمزمية متحمدانا يا حبيب

تعرف ، آخر مرة جيت فيها من السودان ، كنت واقف في صف طويل في المطار، كل زول شايل جوازو وتذكرة سفرو ، وفي انتظار ضابط الجوازات الـ يختم لينا عشان نخش الصالة للوزن وباقي تفاصيل الرحلة. ولما الوقفة طالت ، والضابط ما طلّ ، واحد من الواقفين في الصف إتبرع وفتح الباب القريب من الشباك ، وكانت غرفة قاعدين فيها مجموعة من الضباط ، فيهم الـ بسفسف في فول مدمس ، وفيهم البشرب جبنة ، وفيهم الـ سجارتو قصبة . الرجل قال ليهم : السلام عليكم ، يا أخوانا واقفين لينا اكتر من نص ساعة والطيارة دي خايفنها تفوتنا . نهره ضابط بصوت قوي سمعناه كلنا في الصف المجاور: وما تقيف نص ساعة يعني شنو؟ ما عندك حبة صبر لغاية ما نجيك؟ امشي اقيف زيك وزي الباقيين لغاية ما يجيك الضابط.. ورجع صاحبنا مكسوفأً يطنطن بكلمات مبهمات ، ووقف في حتتو .. (تعرفتُ على ذلك الرجل لاحقاً وكان مهندساً بمملكة البحرين)

دي مسائل حاصلة يا ود الشريف في عموم البلد تقريباً ، والمواطن مفروض دايما يكون شايل معاهو شوال صـَـبـُـر يغرف منه كلما احتاج. لا أحد يحترم زمنك (فالعجلة من الشيطان) .. والمستعجل ليها شنو وآخرتا كوم تراب.
الله يحسن لعوان ياخي

الابن نزار تحياتي

والله الواحد كان مستبشر خير بقدوم ضباط الجوازات وانه الواحد ما ح يضيع وقت طويل

في انهاء اجراءات تجديد الجواز او جواز جديد ولكن الظاهر الروتين القاتل ورانا ورانا

دا كوم وقصة الضيافة والجرايد والمسليات كوم اخر .!!!! وحكايت الاستقبال البقه زي

ود اللحد الله يجرنا واياكم

انت جلست ساعة ونصف في التجديد وانا ثلاثة ايام في اصدار جواز جديد وبعد ده الاسم

طلع ناقص وكذلك الاسم باللغة الانجليزية غلط وطبعا ما قدرته امشي مرة اخرى للتعديل

لضيق وقت العمل مش كل مرة ح يدوك اذن عشان تمشي السفارة والله يكون في العون.

ود الخبير كتب:: الاخ العزيز والراقى نزار تحياتى واشواقى لشخصكم الكريم اسمح لى اخش فيك شمال شويه بالنسبه للسفاره وحاله البؤس الضاربه فيها وتبعتها من بخل وعدم اكتراث من الاخوه المهمين فى السفاره دى حاصله لاكين اسمح لى وانا اخر من تتصور انو عندى علاقه بالموضوع اقول ليك حكايه الجواز دى والزمن الطويل التمت فيه عمليه التجديد عمليه سوء طالع بس ليها مبررات انت لوعرفتها انامتاكد انك حاتقبل بيها بصدر رحب بعدين الجماعه يدوب قالوا يارحمن يارحيم مافى داعى لشيل الحال حقو كان تسمع شكوى تانيه من اى شخص اخر بعدين تعقب على المساله دى ولك من فائق الاحترام والتقدير اخوك الجديد القديم ودالخبير

الأخ ود الخبير ، مرحب بيك تاني ،، وشرفتَ الملتقى

ياخي "سوء طالع" طيّر لي كتابة كتيرة كتبتها في ردي ليك . وربّ ضارة نافعة.
المهم ، دخولك شمال ما مشكلة . وإيحاءك بإني استعجلتَ في ملاحقة الناس الـ "ياداب قالو بسم الله" ، على قول مضيفة الطيران إياها .. برضو ما مشكلة. فالملتقى مفتوح للرأي والرأي الآخر.
وعشان أثبت ليك حسن نواياي ، فأنا منتظرك تقول لي "المبررات" التي قلت لي إنني لو عرفتها ح اتقبلها بصدر رحب. وبرجع أناغمك بعد أقرا المبررات دي
فإلى ذلك الحين ، تقبل احترامي

أبونا كمبلاوي
الـ جاتك في إسمك سامحتك .. وبعدين ياخي عايز بإسمك الأنجليزي شنو؟ مسافر امستردام ، لا سمح الله ، ولّ شنو!!
كدي أصبر معاي شوية ، نسمع "المبررات" من أخونا ود الخبير .. يمكن الناس ديل معذورين ، وكمان عشان ما نبقى ناس شنافين ساي
وحكاية المضايفة ، شاي وقهوة وموية زرقا وجرايد ، نخليها على جنب شوية برضو .. الأزمة المالية العالمية دي يا حبيب بقت شماعة الأغنياء والفقراء . الـ تهبشو كلو يكورك :ياخي الأزمة المالية عدّمتنا التعريفة، ولابد من ترشيد النفقات
هي نفقات السجم دي ما تترشد إلا في الشاي والجرايد الـ بي 100 فلس دي؟؟

على العموم ، خليك قريب وشوف معاي "مبررات" ود الخبير

[size=18]

وانت الصادق هلسنكي عدييييييييييييييييييل كده

ونحنا في انتظار ود الخبير وتبريرات والى الوقت داك

كن كما انت دائما رايع

[/size]

عدد الرسائل : 37 تاريخ التسجيل : 05/04/2009

احبائى واعزائى اخوتى الاجلاء نزو وديدى واسمحوا لى ادلعكم يمكن اخفف شويه من الحمل بالنسبه لى المبررات العايزين تعرفوها بى بساطه شديده كان فى طلب مقدم من الهيئه العامه لشئون الزراعه والثروه السمكيه بخصوص حصول وفد مكون من 20 شخص لتاشيره دخول للسودان صادف حظ الاخوه الضباط العاثر يجو فى الوقت الانته جيت فيهو ونحنا ناس بى طبعنا بنكرم الضيف وجات فيك انته يانزو والجاتك فى زمنك ضايقتك ولك العتبه حتى ترضى اما بالنسبه للخال كمبلاوى انا ماعندى فكره ولا انا الجهه البتوضح لاكين برضوا بقول ليه روق المنقه شويه على الشباب لسه ماعرفنا مويتهم شنو بعدين ماتخلوا صاحبنا يعكرصفوكم ويخليكم دايما متحفزين لاى اخفاق من الجابريه طرف ودمتم زخرا لنا والجايات اجمل من الرايحات

يا جماعة سعيكم مشكور
واعذروني في التأخير ، وبجيكم راجع بعد اصلح الكمبيوتر

بس على الطاير كده يا ود الخبير : التأشيرات دي موش مهمة القنصل ولّ أنا رامياني ناقة؟؟؟

عدد الرسائل : 37 تاريخ التسجيل : 05/04/2009

سلامتك يااخوى من وقوع الناقه المهم دا الحاصل وماتجرجرنى لاى حاجات تانيه انا شخصيا عكست ليك الحصل فى الموقف بتاعك مع الاخوه الضباط ام هم جوه بيعملوا فى شنو والمسئول عن التاشيره منو والسبب الخلاهم متابعين اجراءت الوفد شنو دى انا ماعارفها وبعدين ماتحكها كده يا نزو وتسلم من الوقوع

مميز عدد الرسائل : 2317 تاريخ التسجيل : 10/10/2007

الأخوة الأعزاء لكم التحية

الأخ ود الخبير ، الملتقي ملتقاك ، وبين أهلك و أخوانك ، بس لو سمحتة شوية تعريف كده ، لآنه الواحد حاسي الحميمية في ردوك و خطابك للحبيب نزار ، لانو جد ورقم إنه الأسم مكتوب لكن ، ما عرفتك ؟ ممكن ده يكون ما مهم بالنسبة ليك رقم أني أول المرحبين بشخصك و الظاهر من ردوك إنك زول جميل ( و واقعة ليه ) لكن لو رفعته لينا السيتارة يكون أجمل و أرجوا عدم الحساسية ، ولك التحية

ود الخبير كتب:: احبائى واعزائى اخوتى الاجلاء نزو وديدى واسمحوا لى ادلعكم يمكن اخفف شويه من الحمل بالنسبه لى المبررات العايزين تعرفوها بى بساطه شديده كان فى طلب مقدم من الهيئه العامه لشئون الزراعه والثروه السمكيه بخصوص حصول وفد مكون من 20 شخص لتاشيره دخول للسودان صادف حظ الاخوه الضباط العاثر يجو فى الوقت الانته جيت فيهو ونحنا ناس بى طبعنا بنكرم الضيف وجات فيك انته يانزو والجاتك فى زمنك ضايقتك ولك العتبه حتى ترضى اما بالنسبه للخال كمبلاوى انا ماعندى فكره ولا انا الجهه البتوضح لاكين برضوا بقول ليه روق المنقه شويه على الشباب لسه ماعرفنا مويتهم شنو بعدين ماتخلوا صاحبنا يعكرصفوكم ويخليكم دايما متحفزين لاى اخفاق من الجابريه طرف ودمتم زخرا لنا والجايات اجمل من الرايحات

ود الخبير كتب:: سلامتك يااخوى من وقوع الناقه المهم دا الحاصل وماتجرجرنى لاى حاجات تانيه انا شخصيا عكست ليك الحصل فى الموقف بتاعك مع الاخوه الضباط ام هم جوه بيعملوا فى شنو والمسئول عن التاشيره منو والسبب الخلاهم متابعين اجراءت الوفد شنو دى انا ماعارفها وبعدين ماتحكها كده يا نزو وتسلم من الوقوع

يا ود الخبير ، مرحب بيك تاني وبدخولك الشمال .. وكلو عند العرب عرديب ، لأنو الملتقى ده ، زي ما قلتَ ليك ، مفتوح للرأي والرأي الآخر ، فما تتحسس .. والحساس ـ هنا ـ يملأ شبكتو

قلتَ "مبررات" ، لكن شايفك جبتَ مبرر واحد ، هو إنو الجماعة مشغولين بزيارة الوفد الكويتي . وسألتك ـ على الطاير ـ عن الـ بمنح التأشيرات في السفارة خلاف القنصل؟ فـ حاولتَ تتزاوغ . مع إنك براااك الـ جيت تتقافز وتمنح "المبررات" ..
أها ، سمعتَ "مبرراتك" ، وما قبلتها بصدر رحب . عارف ليه؟ لأنه تبريرك مخل وفارغ ، ما لم تجاوب على السؤال : منو الـ بمنح التأشيرات؟ القنصل ولّ ضباط الجوازات؟

بعدين شايفك رميت ليك "قنبلة" وكبيت الزوغة برضو ، قلتَ لي : (بعدين ماتخلوا صاحبنا يعكرصفوكم ويخليكم دايما متحفزين لاى اخفاق من الجابريه طرف ) .. صاحبنا منو يا خوي ده الـ بخلينا متحفزين لأي إخفاق؟؟ يعني براك شايفني انتظرتَ "مبرراتك" حتى بعدين كاتبتَك ، وتقول لي متحفز؟ وتاني ح انتظرك تجاوبني ـ وعسى ما تتهمني بالتحفز تاني ـ وتقول لي : صاحبنا منو ده الـ بخلينا نتحفز ده؟ خليك واضح يا جميل عشان ما أحكـّها لمــّا تجيب الدم

وبجيك راجع بعد تجاوب
بس قبل ما امشي أشكرك على التدليع .. هو في زول لاقي ياخ
تحياتي

عدد الرسائل : 37 تاريخ التسجيل : 05/04/2009

الغالى نزو تحياتى للاجابه على سؤالك الاخير بقول ليك البدى التاشيرات فى السفاره ضباط الجوزات (الظاهر انت مامتابع الاخوه ضباط الجوزات بقوموا بكل شى متعلق بالاوراق الثبوبتيه من تجديد وبدل فاقد و خلافه ومنح تاشيره دخول السودان ام السيد القنصل من يوم الناس ديل وصلوا ماعندو شىء بعملوا غير شهاده لمن يهمه الامر اكرر شهاده لمن يهمه الامر فقط ودى تسبيته كده ليوم 30\6 اخر يوم عمل ليهو فى السفاره (يوم عيدالثوره) المهم بعتذر عن كلمه مبررات ماقيلا كتيره عندك كده ومهمه وخليك حنين وفى الختام بكرر الاخوه الضباط هم البدو التاشيرات وسلامتك من وقوع الناقه وتحياتى للخال كمبلاوى

ود الخبير كتب:: احبائى واعزائى اخوتى الاجلاء نزو وديدى واسمحوا لى ادلعكم يمكن اخفف شويه من الحمل بالنسبه لى المبررات العايزين تعرفوها بى بساطه شديده كان فى طلب مقدم من الهيئه العامه لشئون الزراعه والثروه السمكيه بخصوص حصول وفد مكون من 20 شخص لتاشيره دخول للسودان صادف حظ الاخوه الضباط العاثر يجو فى الوقت الانته جيت فيهو ونحنا ناس بى طبعنا بنكرم الضيف وجات فيك انته يانزو والجاتك فى زمنك ضايقتك ولك العتبه حتى ترضى اما بالنسبه للخال كمبلاوى انا ماعندى فكره ولا انا الجهه البتوضح لاكين برضوا بقول ليه روق المنقه شويه على الشباب لسه ماعرفنا مويتهم شنو بعدين ماتخلوا صاحبنا يعكرصفوكم ويخليكم دايما متحفزين لاى اخفاق من الجابريه طرف ودمتم زخرا لنا والجايات اجمل من الرايحات

[size=18]

تحياتنا يا ود الخبير

والظاهر نحنا معلومين لديك ولكنك مجهول لدينا

مع انه اسمي دا ما اسم دلع ولكن ايام الكرة وديدي البرازيلي

وحكاية المبررات طلعت اوت صايد فحسب فهمي التأشيرات كوم

( وتجديد الجواز او جواز جديد دا كوم تاني ( شين لم الشامي على المغربي

وبعدين بالعكس كلا منا ده المفروض يفرحو بيه لانه بنور ليهم الطريق لي قدام

بعدين شنو قصة صاحبنا البعكر صفونا وياتي اخفاقت الانت جاي تقول عليها

في الجابريه نرجو التوضيح

وفاصل ونعود

مميز عدد الرسائل : 2317 تاريخ التسجيل : 10/10/2007

الأخ ود الخبير تحياتي و للمرة التانية و التلاتة أنت منو ؟؟؟؟ لآنك شايفك كده إتجاوزتني ؟

و الأخوه بجوزات السفارة ، وده ما دفاع عنهم و لا توضيح لكلام الأخ نزار هو خيرني مني في توضيح وجه نظره العزيز نزار كل الموضوع طرح سؤال و أظنه واضح ،

أما الأخوة بجوازات السفارة و حسب رأي الشخصي عنهم ناس ولاد بلد ( بالمعني السوداني ) و ننتظر منهم كل الخير

و أخيراً وليس أخر أنت منو ؟

يا ود الخبير
أمانة ما إتلومتَ يا زول
يعني هسة إنتَ قايل إنو كلامنا ده تصفية حساب شخصية مع (كائن من كان) في السفارة؟ وبدون خجلة جايي وشايل بقجة غباينك تهمز وتلمز وتطعن في قنصلها؟ إنتَ منو؟ خليك شجاع ، ما في زول ح يضربك طلقة في راسك .. ما تخاف
وإذا كنتَ بتعرفني ـ زي ما بتدعي ـ فأكيد تكون عارف إني قلت ما قلت بدافع المصلحة العامة اللي بتلفت انتباه القائمين في السفارة لمراعاة تجويد الأداء للمراجعين من كافة أطياف السودانيين هنا .. وقلت غيره من قبل ، ولا أريد عليه جزاء ولا شكرا. ولو كان في نيتي التشويه والنقد الهدام ـ زي ما إنت بتحاول تعمل هسة ـ كنتَ قلت ما قلت في موقع سودانيز بتاع البشتنة داك ، والمقروء جداً لدى عموم السودانيين في الداخل والخارج ، وبما فيهم الوزارات الكبرى.
صدقني ، لو كان عندنا رأي في القنصل أو في أي موظف غيرو ، كنا قلناه عديل بدون لف ولا دوران ، وبدون غمز ولمز زي الـ بتعمل فيهو ده . كلامي كان واضح ، وعمومي ، ويستهدف تحسين الأداء ومراعاة ظروف الناس الـ بتجي السفارة لإجراء معاملات تخصها ، ولو ما بتعرف عربي ، تبقى دي حكاية تانية يا شيخ
هسة يا مولانا ، إنتَ منو؟ وقدامك 24 ساعة تكشف فيها عن هويتك بالإتصال على أي واحد من الأخوة المشرفين ليتعرفوا عليك ، وإلا فـ ما تلومنا لو وقفنا اشتراكك .. لأننا مانعين الأشباح وطيور الظلام منعاً باتاً من الكتابة هنا

عدد الرسائل : 37 تاريخ التسجيل : 05/04/2009

الاخ الفاضل ود الشريف عفوا انا فى غايه الاسف لعدم تمكنى من الاتصال بك والرد على استفسارك لاكين صدقنى اولا انا ماعندى رقم تلفونك او اى واحد من الاخوه المشرفين كنت بتمنى اواصل معاكم فى المنتدى حتى تعم الفايده للجميع لاكن نسبه للتهديد بفصلى عن منتداكم الجميل افضل الانسحاب عن اكمال المسيره وانشاء الله نلتقى فى ظروف احسن من كده وتقبل فائق احترامى لك ولباقى الاخوه الاعضاء الذين لم تتسنى لى فرصه معرفتهم وفى الختام سلام

عدد الرسائل : 37 تاريخ التسجيل : 05/04/2009

الغالى نزو تحياتى اولا انا ماشبح ولا حاجه انته بتخاف من الاشباح ولا شنو تانى حاجه يا عزيزى قصه نقدك البناء القاصد بيه الاصلاح دى خليها للناس تحدد لوكانت للاصلاح ولاحاجه تانيه تالت حاجه انت القلت (مجرد تجديد جواز ابتعثوا من اجله ضابطى جوازات ) الانته بتتهم بالتقصير وضياع زمنك الغالى رابع حاجه وصلك توضيح للملابسات الحصلت وبدل مايكون عندك الشجاعه تتاكد من مصداقيه كلامى وتحاول تعتذر عن الاذى الجسيم السببته للاخوة الافاضل ضباط الجوازات مصر تقلب الصفحه وتجرجرنى فى مهاترات بايخه انا فى غنى عنها خامس حاجه انا كنت منتظر فرصه معينه تلمنى بيك او احد الاخوه الافاضل مشرفين المنتدى علشان اعرفكم بنفسى لاكن للاسف الظاهر مداخلتى برجلت حسابتك بعدين صدقنى كل كتابتك واضحه فى الموضع ده والمواضيع المشابهه عزيزى نزار صدقنى انا اتغشيت فيك شديد وقايلك ثابت واسلوبك الجميل فى الكتابه ماليهو حدود بس للاسف وصلت الرساله ووضح المضمون سادس حاجه القال ليك منو كلامك ماعمل بلبله للاخوه وشنو سودانيز اون لاين كفايه منتداك الراقى ده العايز تطردنى منو سابع حاجه بقجى دى معقول ظاهره كده وانا ماجايب خبر كدى راجع نفسك وكتابتك بتعرف ليه انا دخلت ليك القنصل فى كلامى بعدين الكلام القلته عن المهام مشوار صغير للسفاره تتاكد منه

مميز عدد الرسائل : 2317 تاريخ التسجيل : 10/10/2007

الأخ ود الخير لك التحية

أولاً قصة تنسحب ما جملية و خلي صدرك رحب و قابل الناس بالرد ، و بعدين بس مجرد نقرة علي أسمي كان لقيت التلفون ،

و نجي لمسألة الإنسحاب دي تاني الحبيب نزار كلامة واضح أظنة ، يا أخي قولينا أنت منو ؟ بس عشان الناس تكون عارفة إنها بتتكلم مع منو ، و كده إتصل ، ، ووأقول ليك ساهل جداً جداً أنو نعرف أنت منو في عصر العولمة دي لكن الأسلوب ده بين الأخوان ماجميل وكده ؟

أول شي ده تلفوني يا ود الخبير : 94453055

والشي التاني ، عشان ما أنسى ، ما قلتَ لي بخصوص صاحبنا الـ بعكر صفونا وبخلينا "دايماً متحفزين لأي اخفاق من الجابرية طرف" زي ما قلتَ في مداخلة سابقة.
ثمّ الأذى الجسيم السببتو أنا (للأخوة الأفاضل ضباط الجوازات) ، كما تقول أنت ، أنا شخصياً ما شايفو . ولو حصل فهم يستاهلوا . لأن الأولى بهم هم أن يعتذروا لي ولأي مواطن يتم تأخير معاملته ، وليس العكس . المواطن أولى بالمعروف في بلده ، والسفارة في قاموسي الافتراضي هي البلد. وانتقاد تقصير القائمين على أمر البلد جائز ومشروع ، ولا يجب أن يُقابل بالردع وصك الوجه .. وليت القادة ـ كل القادة ـ يتعلمون فضيلة الاعتذار عن أي فظيعة من الفظائع التي يرتكبونها بحق البلد والمواطنين.
ماذا كان سيضير ضابط الجوازات ( المشغول بمهر جوازات الأجانب العشرين بالتأشيرات) لو قدم لي جوازي بعد تجديده ، مع كلمة سهلة تقول : "معليش يا ابن العم ، أخرناك ياخي " ؟؟ صدقني ، كانت هذه الكلمة ستنزل منزلاً ممتازاً في وجداني ، وكنتُ سأكبرها فيه وربما تكون مدخلاً للتعارف الأخوي .. موش كلنا سودانيين وفي غربة!!

بعدين ياود الخبير كلامي لم يكن كله عن الضباط . بل كان عن عموم التبدل في السفارة . ابتداءً من غرفة الاستقبال وحتى أهازيج هارموني وساهور، مروراً بالجرايد والمضايفة بالشاي والموية. وفي تقديري أن المضايفة والتعامل الطيّب هي العنوان الأبرز الذي يشير إلى الرقي والتحضّر ، بل هو قمة الدبلوماسية. وحين ينشطب هذا العنوان فإن باقي الرسالة لا يسمح لك بشيئ غير التعفر في التراب الذي يفيد بأنك لا شيئ. تتأخر ساعتين تلاتة ، ما مهم . اتفضل معاملتك واطلع برة. (وتاني ما تجينا ذاتو).
ويا سيدي ، نحنا أحلامنا بسيطة جداً: أن تتم معاملتنا بشكل طيّب ، طالما نحن نقوم بواجباتنا تجاه الدولة ، رسوماً وضرائب و"مؤاخذات" تانية. مثلها مثل أحلام أهالي الداخل : عالجونا وقرونا وصلحوا لينا الكهربا والموية وخلوا لينا حبة قروش نعيش بيها ، وإن شاء الله بعد ده تحكمونا 300 سنة. السودانيون هنا لا يحلمون بأن يزورهم السفير ، مثلاً ، في بيوتهم أو يتفقد نتائج أولادهم في المدارس أو يسأل عن صحة مرضاهم أو يترحم على موتاهم . هذا كثيرٌ على الناس هنا . هم لا يريدون سوى أن يُتعامل معهم بإخلاص وتقدير في سفارة بلدهم.

أما إنك إتغشيت فيني ، فـ عادي. أنا بشر وأنت بشر. واعتقادك إني غشيتك ، وأنت صدقتني ، كلها تندرج في خامة الإنسان المتقلبة. ولا شيئ يبقى على حاله. أنا قلتُ كلاماً أعتبره صادقاً ، وأنت تلقيته كأكذوبة. فـ هاردلك.
ومع كلّ هذا الذي قلته لك يا أخي ، فإني أعتذر لك عن أي مخاشنة لفظية أصابتك ، من مجمل كلامي السابق والحالي. وعزائي أن الموضوع ليس شخصياً أبداً ، لا معك ولا مع الآخرين الذين قلت إنني سببتُ لهم أذىً جسيما.

عدد الرسائل : 37 تاريخ التسجيل : 05/04/2009

نزو مساء الخير وانشاء الله خمسيك يكون ظريف فى حاجه انا نسيت اقولا ليك لاكن جات المناسبه تصدق الاخوه الضباط اعتذروا ليك قدام مجموعه كبيره من الناس فى حدث سمايه الاخ عثمان رباح فى الوفره وانا شاهد ومن ضمن الحضور ناس مقربين منك واكد الاخ على مسئول التجديد والتاشيره انو عمليه تجيد الجواز فى العاده بتاخد معاهم 3 دقايق بس سوء الطالع جات فيك يعنى هم بادروا واعتذروا قدام عدد كبير من الاخوه الحضور لا لشىء انما لشعورهم بانك اتضايقته من الحصل عموما وصلنى رقم تلفونك اوعدك اول ماانزل رصيد ادق ليك ومشكور على الاعتذار ومقبول والله يديمك لينا (طبعا انا مابحب المخاشنه فى الاسلوب والالفاظ لانها بترجعنى العصر الحجرى وكلام الحله ) وفى الختام بقول ليك خميسك لو تبيع قميصك اصلوا انا يوم الخميس دا عندى مقدس هنا فى الكويت واليوم بالتحديد بعد ماقريت قصه كمونيه حاجه سكينه مزاجى رايق وارجوك تبلغ تحياتى للاخ عبد الوهاب وقل ليهو القصه دى شالت من البقجه كوم كبير

صباحك جميل يا ود الخبير
طبعاً شكراً لصديقنا المشترك "شيكو" الذي جمعنا تلفونيا في يوم خميسك المقدس، فزال الالتباس وتحققت المعرفة التي هي موجودة سلفاً لكن العتب على اسمك المشاتر بتاع الكوتشينة ده ، الاشتركتَ بيهو في المنتدى. وليتك اشتركتَ باسمك البنعرفو.
ولأني لا أشك في مصداقيتك ولا في حسن نوايا السادة الضباط ، فإن الاعتذار مقبول عندي بلا تردد. فلهما مني الشكر أجزله والأمنيات لهما بالتوفيق .ويسعدنا جداً في الملتقى أن يبادرا بالتسجيل فيه ، ان شاء الله للونسة ساي، وكذلك الدعوة مفتوحة للصديق العزيز شيكو الذي سيكون اضافة ممتازة لو قال بسم الله وسجّل.

والبوست ده خلاص كده استنفد غرضه ، فـ نتلاقى في الأفراح إن شاء الله ، في يوم خميس كده يا عمّك تكون كمونية حاجة سعدية متوفرة وكوارع "سنايت" بكامل اللزوجة. وتحياتنا للخبير وفريق الويست .. وأزوركم قريب بعون الله

أبو أشرقت سلام ، والحمد لله طلعتو أصحاب .. وانحلت - الكضية - بتاعت الأخوة الضباط ، وإتعرفت هوية الأخ ود الخبير بالنسبة لكم على الأقل

عشان تعرف - يا أبو أشرقت - أن الوطن حقه دائما مهضوم ، لم يجد هذا الكلام ، على أهميته ، اهتماما من أحد

NIZAR كتب:: في الزمن الزمين ، كنا حين نزور السفارة لإجراء معاملة ، وهي زيارات متباعدة وتحكمها الضرورات ، يستقبلنا الاستقبال بالبشاشة والوّد ،
وإذا كمان عايز تنتظر في الاستقبال ذاتو فـ خير وبركة : الصالة وااااسعة . الشاي والموية يجوك في محلك ، والجرايد طازجة أكان سودانية أو كويتية والتلفزيون يلعلع ، شي هارموني وشي ساهور وشي نيل أزرق ، والداخل والمارق يسلم عليك أكان سفير أكان قنصل أكان سوّاق أكان زاير ساي .. وبعد شويتين تستلم معاملتك والناس تودعك بالابتسام والمطايبة السودانية المعروفة.

هسة الحاصل شنو في السفارة؟ الناس مالها مضلــّمة كده ومليانة كآبة؟ والبــُـخـُل ده جابوهو من وين؟

اليوم الصباح مشيت السفارة لتجديد جواز ما ظنيتو يستغرق أكتر من ربع ساعة ، مرقت من هناك بعد ساعة ونص ، عداً ونقداً في الإنتظار. موية زرقة ساي نبدد بيها السأم ، ما أدونا.
وأنا قاعد في الاستقبال ، الذي تمّ فصله فصلاً تاماً وبصورة ركيكة جعلته أقرب إلى غرفة معيشة بائسة منه إلى استقبال سفارة، جال في خاطري مشهد من مشاهد مسرحية المهرج الـ كتبها الشاعر السوري محمد الماغوط ومثلوها فرقة الأصدقاء: الضابط بيستجوب في "صقر قريش" الـ دخل البلد بدون أوراق ثبوتية ، بيقول ليهو : وين جواز سفرك؟ .. صقر قريش ماعارف يعني شنو جواز سفر لأنو في زمنو الحدود كانت لسة ما تمّ اختراعها. فـ بيقول للضابط : ومنذ متى يحتاج العربي إلى إذن وورقة ثبوتية لكي يتجول في مرابع العربان؟ فيرد الضابط بتهكم: انتَ قايلها فوضى زي زمنكم بتاع قفا نبكي ؟ الواحد فيكم يركب حصانو وبرطع برطع برطع الليل كلو لافي في الصحرا لا إحم لا دستور؟ تلقاهو ساكن في بغداد ومجكس في الرباط؟؟ لا ياخوي البلد دي فيها نظام ووووو....
أها أخوكم جاء الليلة وشاف "النظام" بعينو في السفارة:
الإستقبال غرفة ضيقة جدا . ما فيهو تلفزيون . انتهت لعلعة هارموني وساهور. ولا فيهو جرايد سودانية . والجرايد الكويتية بتارخ 27 مارس الفات ولغاية 3 أبريل ده.

ليه؟ مالك يا سفارة؟ الحاصل عليك شنو؟

أتمنى مخلصا أن يتكفل أحد من الإخوة في السفارة بالتعليق على ما طرحه الأخ نزار من ملاحظات حول استقبال السفارة ، التي يترأس فريق الدبلوماسيين فيها ، الديبلوماسي المخضرم سعادة السفير إبراهيم مرغني الذي أثبت أنه رجل من الطراز الرفيع ومن خيرة الرجال الذين يمكن أن يمثلوا السودان في الخارج

استقبال السفارة ( أي استقبال سفارة في أي بلد ) والذي لا تتعدى حدودة 20×20م2 على اقل تقدير هو يمثل الوطن ( أي وطن ) حتى وإن كانت مساحته مليون ميل مربع وعدد سكانه 40 مليون

بوستك لم يستنفد غرضه بعد يا صديقي ...

تحياتي ومودتي ..

مميز عدد الرسائل : 2317 تاريخ التسجيل : 10/10/2007

أكيد الواحد سعيد جداً لما وصل إليه الأخوة نزار و د الخبير و تبقه البينا عامرة إنشاء الله ،

بس في نقطة مهمة وحساسة ذكرها العزيز نزار و أشار إليها الأخ العزيز قواسمة في مداخلته، أرجوا أن نقيف عندها لأنها و في إعتقادي إنها بتهمنا كلنا مسألة الضيافة لبلد أتصف أهله بالكرم و الجود ، معك أخي قواسمة في أن يتكفل أحد الأخوة بالسفارة بالرد ،

و