d]]نقرشتي
وتر الحمي
في الضلع الشمال
.........
مالك عَلَي ؟!
... أنا كنت رضيان
بالعلي.
بركاني خامد
في الحشا
الريح تصفّر
في المسا
فَتفَتْ
بُكا الصَبُر الحصا
بَرَدت عروق
وهج الصبا
ودفنت
في رمل القسا
ألفين جَرِح
مليون سؤال .
أعترف
أنا حالي كان
غصه وزوال
كنت استقلت
من الهوي
تابت صوابْعي
من الشَرا
تَرْبَسْت قلبي
من الأذي
وشردت
من مِحنة عُطيل
...........
في يوم صحيت
( هاملت ) بقيت
الراس يميل
والكون رماد
مجنون وليل.
سَرْدَبت
لي دق المطر
ووقعت
في شَرَك الخطر
وشربت سم
لسْع الكتال .
أعترف
قَبّلت من وش
الهوي
وشدّيت سرج
خيل النزال
وتجيني
زي برقاً محال
نقرشتي
وتر الحمي
في الضلع الشمال.
........
مالك عَلَي
أنا كنت رضيان
بالعلي
أنا أصلي
ما الزول الزمان
ما ظن أصدّق
قول عيون
أو ألقي
في حضناً أمان .
أنا بس بقيت
قُرطاس وسيف
قطّعت شوق
قلبي الرهيف.
بَردَت عروق
وهج الصبا
وانتي الربيع
وانا خيلي
دافر للخريف
شرقان من الغم
والأسي
الريح تصفّر
في المسا
ودفنت في رمل
القسا
الفين جرح
مليون سؤال .
..........
أعترف .......
أعترف .......
نقرشتي
وتر الحمي
في الضلع الشمال
بركاني ولّع
في الحشا
برقن عيون
سمر المسا .
نزح الخريف
من دمي
وانفجر الصبا .
احساسي
طقطق في الجبال
مطرك شَرَق
فرهد وشي
ونفختي
في جوايا شي
تحت الرماد.
تبيت
علي الزمن الجديد
وقلعت ليك
توب السواد
وعجنتي بالصحوه
الجمال.
.........
يا زوله هوي
مالك عَلَي
أنا كنت
رضيان بالعلي .
القوس هبش
وتر الكمان
غنيت تقول
قمر الزمان
ولقيتني
مدفور لي ورا
رَجَعت صوابعي
علي الشَرا
فكيت زرار
سدر الهوي
ومرقت للنار
من ضرا .
وانا ياني
ده الزول الزمان
ما ظِن أفوت
خيمة عطيل
من نفسي كيف
أشرد عديل ؟!!
............
............
نقرشتي
وتر الحمي
في الضلع الشمال
احساسي
طقطق في الجبال
مطرك شرق
فرهد وَشي
نفختي
في جوايا شي
تحت الرماد
وقلعت ليك
توب السواد
وعجنتي بالحمي
الجمال.
يا زوله هوي
مالك عَلَي
أنا كنت رضيان
بالعلي
نقرشتي
وتر الحمي
في الضلع الشمال[/b]
[center]