المستحيل...
حرفك يتوه..
في زحمه
اللون والحبر
والمستحيل
احساسى بيك
..يخمد ينوم
في غمرة الشوق..
..والسهر
****
وأرضك.. بتول
لا عرفت ...
..الحب الكضب
لا...لاقت ..
المويه السراب
لا ضاقت
البلاء ..والعذاب
..لا شافت الطين
لا التمر
****
وضل العصير..
في خطوتك..
يتشابى
..للرجعة التطول...
بان منكمش
دفق خطاه ..
على عويناتك جبر
خلى الزمن
لا قادر يفوت..
لا عاوز يمش
..خلى الثواني .
تقيف تعب
مشدودة بعقرب ضحى
مفضوحة..
..بضوء الشمس
راجياه
من فيضك .بحر
لمان خيالك..في الخيال
..فج وظهر
***
وجدول هناك
..وكتين دفق
يبّس..
حرازى مع المطر
****
ما خاف
نشاف أرضى اليباس
لما انبهل ..
في قلبي ..
ريدك واتعصر
****
ما راعى ..
لجوع السنين
..وكتين جهر
دفق على
كل السكوت
سكت معاى
كل الكلام
والدهشة فيك ..
نقطه وسطر
يا ضحكه الناس الشتر
****
****
خلاك تحرقي
..في حشاى
نارا تلهلب ..
..بالمطر
****
راجيك
تطلى في غيم سماى
وتبدلي
..الواقع خيال
في كفى ..
حزن الكون ينوم
والبيضة تلعب والحجر
****
معكوس بلاك..
موزون عليك ..
معدول معاك
..اىّ اتجاه
كل المنابع
تبدأ بيك
..كل المصبات
فيك تنكسر
..تدفر دفر
****
ما انتى
ريدك ما كضب
ما انتى حبك
..عيب ظهر
****
طير الخريف
كان شفتي جايّى
..ما تقولي عاد
..جايب المطر
****
خليو يساسق
في السماء
لمان تجيك
..ريحه الدعاش
وتحسي بيو
..اتعلمى الشوق والسهر
****
خليني فيك ..
أكون شهيق
.. ادخل حشاك
..أتبل بيك
امرق زفير
لدنيا ما بتعرف صبر
****
عينيكي ياوعد الزمن
عينيك محطة
..في كل حتة
في كل
..ساعاتي ألبقن
في كل
لحظاتي البجن
بتحرك ..الحس في الحجر
****
والمستحيل
اعشق بلاك..
والمستحيل..
أختاه هواك
والمستحيل تالت كمان
أتلافى فيك..
..روعه قدر
موضوع: قصيدة - المستحيل غيرك يكون -صديق العربي 
السبت 26 مارس - 3:45
