جوا ب في العيد
صديق العربي
قضيت العيد
معاك يا يمّة ..
في الأحلام
لأنة العيد
لقاني براى..
شقى الأيتام
***
دموع
ممزوجة بالفرحة
دموع شقيانة ..
فيها كلام
***
دموع حرقة ..
ودموع غربة
بيبقى سهادها
..ليك إيهام
عشان العيد
قضيتو براى
..بكى وآلام
***
عشان يايمة
..ما رسلتي فوق العيد
..وقلتي سلام
لأنو العيد
..بلاك يايمة..
..ماهو تمام
***
جاني العيد
وأول عيد
..يا يمه في بعادك
..بسكو دوام
عشان يايمة ألقاكي
وأقصّر في الطريق..
..قدام
***
واريتك
لو تعرفي العيد
بلاك يايمة
..كيف ببقي
وكيف الناس..
بدون أماتها..
في الأبعاد..
دوام تشقى
***
أصلو العيد
بدون الشوفه ما ببقي
ومعاي صورتك..
..ويبكي كتير
عشان يايمة ما بلقى
...وكيف ألقى؟
***
وأنا المجدوع
في جوف الغربة..
..هايم الليل
وشايل الهم
تياب ملبوسه في جلدي
..ومافي بديل
***
أصلو الهم
أجيك يايمة انتي عديل
ودافر الشوق
جروف رويانه ذي السيل
..تجيكي تسيل
***
لأنو العيد
معاك يايمة..
..ببقي جميل
وأصلو العيد
جمال النيل ..
..وانتي النيل
***
وأريتك
لو تعرفي العيد
بلاك يايمة كائن كيف؟
ذي حفيان..بيتحرّق
في شمس الصيف
وذي عطشان..
ممدّد في طريف القيف
***
وذي زولا حنين
في الغربة..
ليكي وليف
وأريتك يمه.. لو تدري
تكون الحالة..
دونك كيف؟
***
وأريتك يمه
لو رسلتي فوق العيد
...زوادات شوق
جواب مشتاقة لوليدها
كلامو حنان..
..وورقو الكان..
حنين ورهيف
يشيلو الشوق
معاي بجاي
ويوصل للقليبو خفيف
يوصل ..
لجناك بهناك
أصلو جناك..
وحيد وضعيف
***
كاتلو الشوق
دموعو الجارية في الخدين
...مناها تقيف
مناه يشوف
عيون أمو..
ويعرف الحالة ..
..عندك كيف
***
وضل الشاتي
يوم اللمة..في الجمعة
في بيت المال..
باقي وريف
***
وأريت يا يمه
لو بالأيد
..أجيكي هناك
وبي حضرة جلالك
..أقيف
وتجري الدمعة
من عيني ...
..بواقي خريف
***
تسيل
في أبديكي ممكونة
ويتغيّر كمان لونها
لأنو الشوق
جرح بديكي بالمكتوب
جرح خاطرا
..وحيد منكوب ..
..بحد السيف
***
ما أصلو
الدمعة يا أمي
جروح نزفانة من جوه
لما الجوّه..
..من أعماقنا
... يبقي ضعيف
***
وأريتك يمه
لو تدري
شن بتسوّي الغربة
..في الآهات
لما الزول
يكون فرادّي
..لا خطابات لا جوا بات
***
أكيد يا يمه
عايش بس
إلا حقيقة يمكن مات
لأنو الزول
لامن يفقد الأحباب
..بيسكب زاتو ..
في الكلمات
***
ويفتح باب
كبير للشوق
..وتبقى شجونو ذي نغمات
لحن دفين
ورمية حزينة..
فيها أنين
يتبقي سمات
عشان يا يمه
فاقد الناس
وبالإحساس..
بتصحى رفات
***
وأريتك يمه
كنتى معاي
والحداث يايمة
..مو سوّاي
***
أشيلك
في رموش عيني
وأفرّش ليك..
..بساط يدّي
وتبقي معاي
وجوه حشاى
..وأتوه في ..
حضنك الدافئ
وأكون في وجعتك..
...بكاي
***
وبعد ما
أقفّل المظروف
..وأملأ الطابعة
..شوق وحروف
أبوسّك
انتي في خديك..
شمال ويمين
..وفوق الراس
خضوع وحنين
وأرفع يدي
..للمكتوب
ولي ستي
وأقول باي باي
الكويت /سعد العبد لله/ 2009م