قصيدة امدرمان (1-2)

سوق الشجرة

صديق العربي

صحنك بشيل
كل الأيادي
اللسّة ما شافت شبع
... وكل ما بزيد
أصبّع جديد
..يا دابو بالمهلة اتسع
***
وكتين جريدك
فآري بيطاوع الرياح
...بيناتو رقراقك وقع
يا مستحيلة وممكنه
يا صابرة ديمه ومؤمنه..
احساسى بيك حدو السما
...ريد وانطبع
يا فاردّه..
يديك لكل زول..
يا واصله حبلك ..ما انقطع
***
يا واضحة..
في الزمن الطشاش
يا واحده في الخاطر براك
مروية..
..بالريد الدعاش
بتنسمّك...لوعه ووجع
***
وكتين أكون منك بعيد
..ترحل معاى الأمنيات
وأصبح يتيم..تصحي الرفات
وأتحدى فيك ..
..شوقي الركز
.... مردّغ جسيمو عليك دلع
***
اشتقت ليك..
وأنا بين أيديك.
.....نخله وجرّف
...ورقه وحرّف
وأنا فيكى منك وجايّي ليك
***
جواي انتى معاى دوام
زولا حنين ..
قبال يفوت..عاود رجع
***
والمستحيل
...الشوق يموت
والمستحيل..تنهدّ فيك
..باقي الرواكيب والبيوت
***
يا شايفه
...في زمن العمى
يا صابرة زمن العولمة
قهر السنين ..ما ببدلّك
ويغيّر الشوف لى سمع
ما بهدّدك
كان هدّ فيكى زمن طفولتك
..نخوة شبابك
...ساعة رجولتك
***
يا شامه
في خد الحبيب
..عنوان عشق
في قلبي نقشو وانطبع
***
اتوضّى فيني
وصلّى لكل البحبوك يا حبيبه
وهدهدي الوجع البينقّح
.. ..من عيوني
لمّا تتشاقى وتفتّش ..
لدموعي عشان تجيبها
***
وبيني بينك..
....لا هو دفّق لا طلع
***
اغسلي الريد بالصبر
..دمعاتي في الحد قات تقيف
أشواقي ما عرفت منع
***
جددي العشق أمنيات
.... خليني اسرح ذكريات
ومعزّه في صوت الشفيع
.... اللسّه واقف وما وقع
***
ألقاك (فرح) في الأغنيات
ألقاك (شجن) لامن (عتيق)
..بحرفو طاف بيك..( واصطفاك)
***
يا عزّه في (معزّه) خليلك..
....وجارى نيلك
يا شدرة الضل للتعابى
......حلاه بهاك
يا لامّه كل الناس هنا..
..يا شادهه كل الناس هناك
يا باقية مأوى لكل زول..
لاميه حنانك وما طمع
استني فيني
خليتي ارجع بيك أنا
..يا ريتو باكرك كان زمان
يا حليلو كان....
....فوقك شبع
***
هدّموكى..
ودكّوا فيك..باقي المحنّه
لما نفسّك..كان طلع
....ياريتو نفسّك كان طلع

امدرمان/بيت المال / اكتوبر2007م

Admin عدد الرسائل : 982 تاريخ التسجيل : 10/10/2007

يا سلام عليك يا صديق ,,, ما عارف اقول شنو ,,, لكن حتى لو لم يكن للقصيدة عنوان فالقارئ يعرف عن اي مدينة تتحدث القصيدة,,,

اتوضّى فيني
وصلّى لكل البحبوك يا حبيبه

الله أكبر
روعة

» قصيدة امدرمان(سوق الشجرة) (2/2)
» قصيدة امدرمان(سوق الشجرة) (2/2)
» قصيدة الجالية
» قصيدة ليه الملامه
» قصيدة جانى زاير