الملتقي ينادي قواسمة

معك استاذ ود الشريف نقول ........
وييييييييييييييييييييييييييييييييينك أستاذ قواسمة انشاء الله يكون المانع خيييير ونتمنى العودة قريبا

ونحن مالنا أستاذ ود الشريف ما بفتقدونا!!!!!!!!

صديقي العزيز ود الشريف الظريف مشكور يا غالي على السؤال عن الحال والأحوال ( من وين نكت الصورة دي المن زمن الصبا الباكر في الكويت ؟ والله كانت أيام .. هذه الصورة من إحدى احتفالات الجالية بالاستقلال قبل سنين عديدة خلت ) الله يديك العافية

الغاليات إلفة وسوسن الله يخليكن ، تعرفو كانت غيبتي خلال الفترة الفاتت لعدة أسباب من أهمها حسب الترتيب
أول حاجة : حردان ، حردت المنتدى بعد الإنشقاق الكبير للسيدات وتكوينهن المنتدى الخاص بهن وبالتالي كنت قد اعتقت أن المنتدى سيفقد بريقه وحلاوته عند غياب النصف الآخر خصوصا ونحن بدونكن لا نسوى شيئا
ثاني حاجة : إنشغالات العمل صباحا ومساءً وعدد من الاجتماعات والمؤتمرات
ثالث حاجة : السفر في بلاد الله الواسعة ، حيث عدت قبل أمس فجرا من رحلة استجمام وتدريب في كل من هونج كونج والصين (والله وكيلكن ) صعدت إلى قمة سور الصين العظيم أحد عجايب الدنيا السبعة ( بقي لي خمسة بعد أن زرت تاج محل في الهند قبل عامين تقريبا )، وهناك (في الصين ) تأكدت أن ساستنا كانوا يوما ما بعيدي النظر عندما اتجهوا نحو الصين قديما وحديثا ، بلاد ياجوج وماجوج كما أسماها الرئيس البشير في لقائه الأخير بالجالية ، فحتى سائق التأكسي سمع بالسودان ولم يسمع بشيء في الشرق الأوسط !!
وهكذا .. لعل يكون عندي متسعا من الوقت لأنزل لكم بعضا من الصور التي تبين لكم تلك الرحلة وتلك البلاد العظيمة وكذلك مرحلة الصبا الحالي يا ود الشريف
ستعود بإذن الله تعالى الإتكاءة أرحب وأجمل بكم جميعا
تحياتي لكن يا نصفنا الجميل
وتحياتي للجميع مع كامل الود

قواسمة

والله الملتقى نور أستاذ قواسمة ومنتظرين نتكئ بى مزااااج مع كل جديد و زى ماقالت إلفة دا بيتنا وبننجم فوقو وشكراً على الكلمات الراقية الرقيقة جداً وانشاء الله يرجعو كل الحردانيين والزعلانيين والمشغولين والمتاوقين ومنتظرين الجمييع (أستاذ الحلاوى "وحكايات عوض ود حلتنا", أم أشرقت "+" ست البنات لى قدما والبنوت خدما مع كل مشاركاتا الراااائعة وسيمفونيات شيري, ومحمد عبد الوهاب يا Adminبرضو ماظااهر والغالية نازك وكل الاخوان والاخوات الرائعين دوماً تعالو لا جاى

إلفة كتب:

وعن ( حردانك ) للمنتدي والله ماليك حق لأنو نحن حتى لو شاركنا فى أكتر من منتدي
لا يمكن انو نتخلى عن منتدانا يعنى الواحد بيمرق زيارات للناس وفى الآخر بيرجع ( ينجم ) فى بيتو
والملتقى دا بيتنا البنرجع ليهو دايما فما تحرد نحن معاكم دايما وبشكرك كتير بالنيابه عن أخواتي فى الملتقى على كلماتك الرقيقه عننا

طالما الأمر كذلك ، فلا حردان ( بفتح الحاء ) ولا زعلان ( بفتح العين )
والله يفتح علينا وعليكم

إلفة كتب:

لكن عجايب الدنيا دي فى إعتقادي هسه بقن مابتحسبن يعنى ما ( 7 ) بس

متفقين .. بس خلينا نلم في السبعة دي أولا

Sara كتب:

وانشاء الله يرجعو كل الحردانيين والزعلانيين والمشغولين والمتاوقين ومنتظرين الجمييع (أستاذ الحلاوى "وحكايات عوض ود حلتنا", أم أشرقت "+" ست البنات لى قدما والبنوت خدما مع كل مشاركاتا الراااائعة وسيمفونيات شيري, ومحمد عبد الوهاب يا Adminبرضو ماظااهر والغالية نازك وكل الاخوان والاخوات الرائعين دوماً تعالو لا جاى

شكرا يا شمعتنا الضوايا
بس تعرفي أتمنى أن ينضم المتاوقين إلينا لكي نتاوق جميعا من داخل المنتدى على فضاءات أرحب مليئة بالأمل والحب والرجاء
وكم كنت أتمنى أن يكون هذا المنتدى من أرقى المنتديات السودانية في الشبكة العنكبوتية نظرا لما يتحلى به السودايين في الكويت من معرفة ووعي وخبرة
ولكن أن يكون الناس على قلب رجل واحد هذا كالقول والعنقاء والخل الوفي
غير أنني لا زلت آمل في أن يقدم الناس هنا أجمل ما عندهم ، وأن ينتشر هذا المنتدى ويكون إضافة لما يقدمه السودانيون في الخارج لوطنهم وأمتهم

إليكِ كل مودتي