أَما أَن لهذا الليل أن ينجلي ؟؟؟

سلامات يا ود الشريف،
ياتو ليل في الليالي،،، الـ هنا، وللا الـ هناك؟
فالليالي طوال !!

طوّل بالك يا صاحبي،،
قررررربت.

NIZAR كتب:: سلامات يا ود الشريف،
ياتو ليل في الليالي،،، الـ هنا، وللا الـ هناك؟
فالليالي طوال !!

طوّل بالك يا صاحبي،،
قررررربت.

نزار وحسين الف مليون تحيه لكم
وليل شنو ده الدايرو ينجلى يا حسين ؟
انا غايتو دايره الحقاره تنجلى وعليك الله يا نزار ماتعشمنى وتقول لى قرررربت

لم اكن اتصور قبل الان ان للحقاره الوان
حقارة تنتشر لتعم المكان
وتصيب من حولها باتقان
وحقاره لايمكن ان يوصم بها انسان
تجعل العقل يتوقف وهو حيران
لا اقول كان فلان بل هو حاصل فى هذا الزمان.

مميز عدد الرسائل : 2317 تاريخ التسجيل : 10/10/2007

أيها الناس نحن من نفر عمّروا الأرض حيث ما قَطَنوا

يذكر المجد كلما ذكروا وهو يعتز حين يقترن

حكموا العدل في الورى زمناً يا ترى هل يعد ذا الزمن

ردد الدهر حسن سيرتهم ما بها حطّة ولا درن

نزحوا لا ليظلموا أحداً لا ولا لاضطهاد مَن أَمِنوا

وكثيرون في صدورهم تتنزل الأحقاد والإحن

دوحة العُرْب أصلها كرمٌ وإلى العُرْب تُنسَبُ الفِطَنُ

أيقظ الدهر بينهم فتناً وكم أفنت الورى الفتن

سلام يا سكينة، والف حمد لله على السلامة..

صدقيني، الحقارة الجاية من الأغراب، مقدور عليها، ومردود عليها بيان بالعمل. لكن المصيبة في حقارة اولاد البيت اللي ياما وياما مدينا ليهم حبال الصبر، فظنوا انهم بيستهبلوننا ويضحكون على شواربنا.
االمصيبة في (كيزان جمعية الفنون) الرعاديد.. المصيبة في هؤلاء الذين لا فرق بينهم وبين (مسيلمة أبو بشت) وحبه المَرَضي للأضواء المخادعة..
لمصيبة في هؤلاء الذين يحاولون المزايدة على وطنيتنا ليغنموا "شنطة" من كونتنر شنط مؤتمر دعم الشرق.. تلك الشنط التي لها أول وليس لها آخر.
المصيبة في هذا الذي ما ان يسمع طرقعة المايكرفون حتى يحزم كرفتته ويفتل حباله الصوتية ويهرول نحو الخشبة، وبين الفاصل والفاصل، يضع المايك في جيبه حتى لا يخطفه منه شخص آخر... هذا الذي يتحدث باسم الجمعية في كل لمة تعيسة، كما لو أنها ميراثاً تركه له والده..
المصيبة في اللي يظهر ليك بمظهر عنترة ويلعلع : انا ، وانا ، وانا ، كلما تحدثت معه وجها لوجه او عبر الهاتف.. ووكت الجد: يصعد الخشبة ويتمايل في خنوع مذل، يقرأ في قصائد الحماسة التي ما حمّست يوماً ذبابة على فطيس...
المصيبة في كل هؤلاء، كيزان جمعيتنا،، وفي غيرهم ممن يحاولون استخدام الجمعية كتمومة جرتك في كل زفة (مواليد الثمانينات يمشوا يسألوا زول كبير عن المعنى)..
جمعيتنا تمومة جرتق في كل زفة، وحطب محروق لتسخين الدلوكة ،، ونحنا، في الكلفتة ودفن الليل اب كراعا برة، ولاااااا هامينا شيئ، يكفتونا في هذا الخد، فندني منهم خدنا الثاني.. ولا عزاء للرجولة، ولا للمبدأ أو الكرامة.
هؤلاء (من أين أتى هؤلاء؟؟) الرمم الذين يقرأوون كيف تستباح كرامتهم كل يوم في صفحة (ناس الكويت) فيمتلئون بالحماسة ويقولون (والله تاني محل فيهو الزول ابو بشت ده انا تاني ما اشرفه بوجودي)، لكن سرعان ما يبلعون حماستهم، ويكربون وسطهم، ودقي يا مزيكة ، ترالالالي لالالالي.. وتاني لاالالالاللي،، ويللا سكسكوا كلكم (على قول ابو عركي)..

عايزين تغنوا؟؟؟ غنوا . غنوا واشبعوا غنا، ان شالله لجنة المواصفات تديكم نوط ابو داود.
ويا صاحب معلقة طرفة بن العبد، في استرداد هجليج ودعم السد،،،، لعلك ظفرت بالوزن الذي تصمد به أمام الريح السوافي!

تفووووو على التفاهة وشيل الحال

مميز عدد الرسائل : 2317 تاريخ التسجيل : 10/10/2007

سلامات يا الحبيب

عساك على القوة و القوة عساك عليها ، بالجد الواحد متحير في الزول ابو جلدا متغير ، و سبحان الذي يغير و لايتغر

الزول اب جلدا متغير، يا رفاعي، ما فضل فيهو جلد زاتو يغيرو، بقى يستلف في جلود الناس الذين ينتعل اسماءهم كما لو كانت أحذيته الخاصة. يومداك قالوا اعلن عن تبرع باسم الجمعية، والجمعية ما جايبة خبر، ولاااااااااااااااااااااا دارية بحاجة.

زولك ده زي الرشيد الطاهر بكر، في اي حكومة مادّي كراعو.. الرشيد الطاهر ـ بتاعنا ده ـ شايل شبكتو وحايم. مرة مجلس جالية، ومرة جمعية فنون، ومرة رابطة مرأة، ومرة صندوق تكافل.. طوااالي شايل الشبكة ورامي قدام: يلقى بحر، يرمي شبكتو، يلقى ترعة، يرمي شبكتو، يلقى بلاعة، يرمي شبكتو،، وما هاميهو يصطاد شنو في النهاية، ان شالله مرفعين.. بس المهم شبكتو دي ما ترجع فاضية في المخلاية آخر اليوم.
ياخي حيرتنا يالرشيد الطاهر!.. انت قلبك ده قاعد يقوليك شنو؟! ما المشاعر التي تنتابك حين تفعل أفعالك هذي؟؟!!

أما الشاعر عنترة الحمّاس، فـ طلع زول جعجعة ساي.. يشبكنا ليك في لحظات الونسة، أنا وأنا وأنا، مجالداً محترّاً، يقول:

وأنا المجرب في المواقف كلها/ من آل عبس منصبي وفعالي
وأنا المنية حين تشتجر القنا / والطعن منّي سابق الآجال

ويزيدنا من الشعر بيت:
وأنا الربيع لمن يحل بساحتي / أسدٌ اذا ما الحرب أبدت نابها

وبيتين كمان:
إني ليث العرين ومن لـــــــه / قلب الجبان محير ٌ مدهــــــوش
إني لأعجبُ كيف ينظر صورتـــي / يوم القتال مبارزٌ ويعيـــــــش

وخمسة ابيات، عشان نآآآآآمن:
وأكر فيهم في لهيب شعاعهـا / وأكون أول واقد ٍ يصلاها
وأكون أول ضارب ٍ بمهــند / يفري الجماجم لايريد سواها
وأكون أول فارس ٍ يغشى الوغى/ فأقود أول فارس يغشاها
والخيل تعلم والفوارس انني/ شيخ الحروب وكهلها وفتاها
وأنا المنيةُ وابن كل منيـةٍ / وسواد جلدي ثوبها ورداها

وبعد الـ أنا أنا دي كلها، في أول طرقعة سيف مع خنجر، يصرّ جلابيتو في عبّو، ويفك كرعينو في الريح..
هااااا يا عنترة!!! ما قلتَ نوبة!!! ياخي عيب الشوم والله.

..
على كل حال، لا ليل أحلك من هذا الليل يا ود الشريف.
يقعوا في الخطأ، فيخلطوا الأوراق، ويتهموك بالتخذيل والـ لاوطنية.
إنها الصورة النمطية التي يأخذونها دائما عنا، ويبدأون في حياكة الأباطيل. (من أنتم؟/ على قول الممثل الليبي الراحل معمر القذافي)
وصدقني يا حسين، نحنا مامحتاجين لشهادة من أحد (أيا كان هذا الـ أحد)، لبرهان وطنيتنا وحبنا للبلد وتضحيتنا عشانو وعشان شعبو الصابر.
استرداد هجليج أثلج صدورنا وزاد في فتيل وطنيتنا شعلة، وعبرنا عن ذلك قبل أي سوداني آخر هنا في الكويت، ليس بسبب البشير ولا حزبه الحاكم بل حبا في السودان الوطن الذي به نفتخر ونتباهى. لم نفعل ذلك تملقا ولا من أجل اي مكسب آني أو مستقبلي.. ولا مسحاً لجوخ كائن من كان.. كل ما في الأمر ان قوات الشعب استردت جزءا عزيزا من الوطن وقع تحت الاحتلال، فكان لزاما ان نحييهم ونحتفي بهم ونتخندق معهم بما نملك، حتى لو مجرد كلمة مشجعة. وقد فعلنا ذلك كأمر طبيعي لا يحتاج الى كل تلك الضجة التي افتعلها الطفيليون مرضَى الأضواء والألقاب والخطب الحماسية..

» كتاب ( المستقبل لهذا الدين 1) لسيد قطب
» كتاب ( المستقبل لهذا الدين 2) لسيد قطب
» كتاب ( المستقبل لهذا الدين 3) لسيد قطب
» كتاب ( المستقبل لهذا الدين 4) لسيد قطب
» كتاب ( المستقبل لهذا الدين 5) لسيد قطب