الملتقى الحر للسودانيين بالكويت
الملتقى الحر يرحب بك ويتمنى لك يوما سعيدا
يرجى تسجيل دخول لمشاهدة المنتدى كاملا وامكان المشاركة بالكتابة والتعليق

الملتقى الحر للسودانيين بالكويت

مساحة لطرح ومناقشة قضايا وهموم أبناء الجالية بكل حرية وصراحة
 
الرئيسيةالتسجيلدخول

شاطر | 
 

 حميد ..الوجع الكامن

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
صديق العربي

avatar

ذكر عدد الرسائل : 44
الهوايات : كرة القدم - الشعر - النت
تاريخ التسجيل : 14/12/2010

مُساهمةموضوع: حميد ..الوجع الكامن    الثلاثاء 27 مارس - 6:41



عصت علي
كل الحروف
لامن بديت ..اكتب عليك
لامن نويت اكتب اليك
***
واتشتتت
كل الكلامات الجميلة
المارقة منك
...
وجاية ليك
اتدفًقت ..
ملت التراب
واتمازجت بالحب عذاب
إطاولت
...
حد السما واتمدًدت
محتشدة بيك
***
وآخر كلامك لينا كان
..
ذي الوداع
(
أرضا سلاح).....
والنية..
سابقاك بي زمن
انك تفوت ..
والطلقة ما تمرق ..
...
تموت
قبٌل ما انت كان
...
يا دوب تموت
***
والوطن
..
شايلو في ايديك كفن
..
ما يندفن
قبال تفوت
وآ حسرة ..
الزول العشم
...
وكتين يموت
***
الا الخشوم
..
بعدك فراغ
فضيانة من باقي الكلام
...
مسكونة..
بلحظات خفوت
مشرورة ..
في صمت الذهول..
نشفانة في باحة سكوت
***
كل الحزن
..
اتلم في سنة الوجع
يوم ما فاتونا الحبايب
(
زيزو) (ووردي) و(نقد)..
يا حليلها كان ..
من بعدكم كل البلد
والليلة جيت
حميدنا تختم كل حزنا
بوجعه جد
..
وآآآة من فقد !!
***
تنشرً في كل المسام
لكل أغبش...
حاسي بيك
انك ....
لسانو الما بيموت
وآآحسرة الزول
فيهو العشم وكتين يموت
***
يا ماشي فينا ..
وبي المنا نلفًحك
نهديك
من جوانا حب
نهديك كل ما بشبهك
***
دمعات سخينة
...
بتنزرف
وايادي ناشفة
..
بترتجف
مرفوعة فوق
لحظات دعاء
يا الله سيدها يوسًدك
مهل البراحات الفسيح
جنات نعيم ..
...
ما بتتوصف
بقدر ما أعطيت لشعبك
بقدر ما أوفيت ولف
***
وآآحسرتك
...
حميد غنانا
وكتين مناديك يندهك
تتركنا للهم والوجع
للزيفة
...
والجو السخانة
وللذلة والخوف النعيشو
وتسيبنا في نص الطريق
...
نمشيو برانا
مش عاد صعب
...
تهجرنا في وطن المهانة؟
وآآآحسرة الزول العشم
...
وكتين يموت
***
وكنا آملين
فيك سفر
..
تفضل معانا
ونبقى بيك ..كمين سنة
نتلاقى
بحرفك نهر
...
نتشابى لعزك مطر
ونتباهى بقامتك شدر
تفضل معانا
ونبقى ليك
وآآحسرة الزول العشم
...
وكتين يموت
***
حميد طريقنا
ونور عيونا
وكت الضلام يتهادي بينا
...
وينفرد
وتشرق علينا
شمس ضحى
وتضوًي كلماتك دروبنا
..
وتفضحها
***
والعتمة
تنزاح من قلوبنا
..
وتشرحها
تيقالنا مد
وتنشًف
احزان الليالي
الفينا من عمر المهد
والخوف علينا
نبقى بعدك ...
نحن في هذا المآل
...
لامن نخش ود اللحد
وآآحسرة الزول العشم
...
وكتين يموت
***
وما كنا نحلم ..
يوم بهذة العجلة بتفوت
أو تنقطع
في ايدينا كان باقي الخيوط
الماسكة لينا
عشمنا باكر
ويبقى لازما يجينا ضوء
...
أو ينقطع حبل السكوت
***
وطيبة
تبقالنا الحبيبة
ونورة تقدًل بي مهل
...
مليانة طيبة
وعبد الرحيم
..
لا قطر يتلافى دربو
...
ولا مطر
ولا بصادف ليهو حوت
وعمنا الحاج
ود عجبنا
لا عساكر يوم يجوهو..
..
لا بيظهر ليهو بووت
***
والخطاوي الراجعه بيك
تضهب طريقها ...
تمش تفوت
وينزل وجع
في كل بيت ..
في كل دار .. في كل شارع
وكل محطة .. وكل جرف
ويبكي كان حتى النخيل
...
دفيق حزين
أخضر ونيء
غالبو الثبوت
آآة يا حزن وجعه زمانك
ولسة كان باقي الطريق
مكتوب علينا نكملو..
أصلو في الآخر نموت

26 /
مارس 2012م
السالمية – الكويت



الرجوع الى أعلى الصفحة اذهب الى الأسفل
 
حميد ..الوجع الكامن
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
الملتقى الحر للسودانيين بالكويت :: الملتقى العام-
انتقل الى: