قصيدة - واداني وين؟؟ - صديق العربي

أديني ..
نافذة روح إليك
يدخل عليك..جدول هناي
... من ضفتين
***
أرويكى ريد
أعصر نشاف عمرك..
..سنين
وأتبلّ بيو من حتتين
***
ويتجارى
في دمك عروق
ذي ما بجر ..
بحرّك مروق
لامن تطفّح وتسألك
..وادانى وين؟
أديني دورين من غناك
أطلع معاك...
أمرق من الدنيا الكضب
..واتلاحقك
***
أدخل معاك
... جنّه هواك
..وأتنفسك
..عشق وحنين
***
ما الشمس
..ما بتقدر تغيب
طوالى في الزمن الضلام
وألوجعه...
نقنا قه الخريف
ما بتلتزم صمت الكلام
والعمر وكتين نحسبو ..
نصّو كان عادّنو دين
***
أديني
مفتاح الدخول....
...لخلوتك
أقفل شبابيك الوجع ..
...لمان تبين
***
وأفتّح
خزائن الحب رضا
..ويفتح قليبك
...ضلفتين
***
ضميني
يرفقا إليك
غتينى بباقي الدموع
...ادخل عليك
من باب خروج الأمنيات
شريان سعادة وألبسك
دفيق تمر..رطبا حنين
***
أرسّم على أرض الوصول
تيراب محنّه...تداعيات
...وأشطّب..
..قهر كل السنين
أمسّح
نشاز الأغنيات
..شان تكبري
وتكبّر معاك الذكريات
ياواحدّه..
..فى ذمني يتبين
***
أدينى مدخل....في حشاك
ألقى في راحتك براح
وأتقسّم الحب ارتياح

أتلاقى بيك..
..وأتمطى في الفرح المباح
تتراخى....
بالنشوى العينين..
..وأتنهدك
***
أصلو الأحاسيس
لمان تجيك...
تدغدغ كيانك..وتحتويك
وتملاك كلام
قبل الكلام
...يمرق عليك
ويسألك
وادانى وين؟
..وأحلم معاك

جميله والله قصائدك واجمل من ذلك مفرداتك المميزه (اتمطى فى الفرح المباح)وان تجعل للوجع شبابيك تقفل ماشاالله عليك يا استاذ صديق فانت تمنحنا مساحه عقليه شاسعه نعبرها بخيالنا وقدر مهول من الحنين الدافق احسه من خلال قراتى لقصايدك وانا هنا اعبر بصدق عن ما ينتابنى من أحساس تجاه ما أقراه شكراعلى الجمل الذى تتحفنا به وهو مؤكد من قلب مملؤ بالجمال والطيبه لك منى تحيه الاحترام والتقدير

تسلم والله وكتر خيرك شديد يا مجمد علي الكلمات الانيقة واتمني ان اكون علي الوعد دوما .انت وينك مشكل غياب وما ظاهر قي المنتدي ؟..نسمع عنك كلو خير ان شاء الله.