الملتقى الحر للسودانيين بالكويت
الملتقى الحر يرحب بك ويتمنى لك يوما سعيدا
يرجى تسجيل دخول لمشاهدة المنتدى كاملا وامكان المشاركة بالكتابة والتعليق

الملتقى الحر للسودانيين بالكويت

مساحة لطرح ومناقشة قضايا وهموم أبناء الجالية بكل حرية وصراحة
 
الرئيسيةالتسجيلدخول

شاطر | 
 

 (وناسه)الوحده والانفصال

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
om ashragat
عضو نشط
عضو نشط


عدد الرسائل : 539
تاريخ التسجيل : 24/06/2008

مُساهمةموضوع: (وناسه)الوحده والانفصال   الثلاثاء 28 ديسمبر - 2:16

االمتابع والمامتابع غصبا" عنه حيتابع
موش عشان الفضائيات والدنيا والعالمين مهتمين
ابدا ... عشان وطنيتنا وحب السودان الجوانا موجود
عشان مابنقدر نتخيل شمال بدون جنوب
رغم اني في البدايه قبل عام يمكن او اقل كنت بقول
نعم للانفصال عشان الجنوبيين فعلا مواطنين درجة تانيه
وعشان عنصرية العرب الماعارفين روحهم انهم بين العرب درجة سابعه ديل
ولو قعدت اعدد (عشان) كتيييييييييره
الرجوع الى أعلى الصفحة اذهب الى الأسفل
om ashragat
عضو نشط
عضو نشط


عدد الرسائل : 539
تاريخ التسجيل : 24/06/2008

مُساهمةموضوع: رد: (وناسه)الوحده والانفصال   الثلاثاء 28 ديسمبر - 2:28

صحباتى ... اجانب يعني ... عرب وغيرهم
كان غبنا اسبوع ماتكلمنا مع بعض لازم يسألونى عن الحاصل
وقبل دا كنت حكيت عن سودانا وكبير قدر شنو ونحنا اعراق واجناس وسحنات
ولهجات مختلفه ووووو (لكشر )عن السودان لكن بأكد انه المحبة والتسامح بجمعنا
من كترة الاسئله عرفت قدر شنو العالم مهتم بمعرفة الحيحصل لينا
وتوقعات الحروب الحتدور وتصريحات ساستنا وولاة امرنا الوصفها كثييييييييير
من العرب باننا امتداد لعهد صدام والعياذبالله

مره ابو اشرقت حكي لي انه في واحد من مؤتمرات السلام ايام جون قرن والحرب
شغاله بين الشمال والجنوب ... بدخلو القاعه وكل واحد بشروطه والحرب هناك شغاله
ويطلعو في الاستراحه ياكلو ويشربو مع بعض ويضحكو ويسلمو علي بعض
وياهو دا السودان



يتبع
الرجوع الى أعلى الصفحة اذهب الى الأسفل
om ashragat
عضو نشط
عضو نشط


عدد الرسائل : 539
تاريخ التسجيل : 24/06/2008

مُساهمةموضوع: رد: (وناسه)الوحده والانفصال   الثلاثاء 28 ديسمبر - 2:42

حزينة جدا" عشان الجميع متوقع الانفصال
ولو حصل ... ليه اسبابو الكرسناها من سنييييييييين
وفي ايام جايين نضحك علي روحنا ونعمل تمثيليتين ومسرحية
وهتافات واناشيد وخلاص

بجد حزينه ... والحزن هو الخلانى افتح البوست دا(واعزي)


يتبع
الرجوع الى أعلى الصفحة اذهب الى الأسفل
Abdlwahab
Admin
avatar

عدد الرسائل : 982
تاريخ التسجيل : 10/10/2007

مُساهمةموضوع: رد: (وناسه)الوحده والانفصال   الثلاثاء 28 ديسمبر - 14:15

والله فعلا يا ام اشرقت ،،، الموضوع دا نحن بنتناقش فيهو في شكل ونسة فعلا ،،، حتي عنوان البوست بتاعك (وناسة) وده الاستفزاني ادخل البوست لكن لقيت بيت بكا ،،،، واتذكرت رواية الان باتون إبكِ يا وطني الحبيب
Cry, The Beloved Country
فاليوم نبكي على قطعة من السودان انسلخت منا بسبب رعونة السياسيين على مر التاريخ ،،، وغدا سنبكي علي عدم مبالاتنا في الحفاظ علي ما تبقى من الوطن،على مر التاريخ
الرجوع الى أعلى الصفحة اذهب الى الأسفل
http://q8sudan.yoo7.com
NIZAR
عضو نشط
عضو نشط
avatar

ذكر عدد الرسائل : 1187
تاريخ التسجيل : 04/03/2008

مُساهمةموضوع: رد: (وناسه)الوحده والانفصال   الثلاثاء 28 ديسمبر - 23:31

سلام يا أم أشرقت وضيوفها
قبل أيام وفي أثناء تصفحي لأحد المواقع السودانية (اظنه الراكوبة)، لاقاني واحد خاتي صورة في بروفايله عبارة عن علم السودان بصورة مقلوبة (يعني المثلث الأخضر فوق وباقي الألوان منسدلة لـ تحت) وفي حتة اللون الـ بالأسود، شكل زول طالع من العلم وبينفض في ايديهو وخطواتو ماشة في اتجاه مغادرة العلم بشكل نهائي.. المؤسف أنني ظننتُ أني احتفظت بالصورة، لكن هذا لم يحدث. وإلا كنتَ نزلتها ليكم بدل الشرح ده.

المهم، المؤتمر الوطني يشتري هذه الأيام صابون الدنيا والعالمين، عشان يغسل يده من فصل الجنوب.. هذا الحزب الكذوب الأفاك الذي يقتل الصدق كل يوم ويتهرب دائماً من دفع الدية.. الدية يدفعوها ناس تانيين.

كدي اقري (أقروا) معاي كلام القدال ، ونتفاهم:
الرجوع الى أعلى الصفحة اذهب الى الأسفل
NIZAR
عضو نشط
عضو نشط
avatar

ذكر عدد الرسائل : 1187
تاريخ التسجيل : 04/03/2008

مُساهمةموضوع: رد: (وناسه)الوحده والانفصال   الثلاثاء 28 ديسمبر - 23:41

طواقي الخوف
محمد طه القدال ــــ 9ديسمبر 2010م




(1)

ما خايف المطر
يتحاشى الضهاري الراجية قولة خيرا
ولا خايف المطر
يمشي على الصحاري تلمو في بشكيرا
ولا خايف العشم
يتناسى العشامى ونيما ياكل نيرا
ولا خايف النفس
تتذكر نفسها وتنسى يوم حِدّيرا
خوفي على البلد
الطيب جناها وقمنا في خُديرا
شاحدك يا كريم
لا تحصل خراب لا أرجى يوم ودّيرا
***
وانا ما بجيب سيرة الجنوب.
عيال بتسرح للمدارس ..
والفطور نجماً بعيد.
بنوت بتجري
على الخطاطيب الخطاطيف
البتجرح ..
والعريس نجماً بعيد.
الدكاكين تملا وتفضي،
السماسرة يسمسروا،
والبسفو الطين ..
يسفوا،
والبحتّوا الراب ..
يحتّوا،
والبناطلين ليها سستم،
والقوانين ليها سستم،
البنوك الفيها بستم ..
من سويسرا ولي ماليزيا
بالسفارات
والعمارات
والخبارات .. .
انا كنت متغطي ..متدفي،
العمة ملوية،
والشال على كتفي.
سودان وكان ما كان
سودان علي كيفك
السكة ساعة إيد
والأرض مروية
والناس حنان وظراف
والراح يجيك ..
للحول
والخدمة مظبوطة
مظبوطة مدنية
والدنيا حرية
الماشي درب الكار يغور
والتاب من التمباك يتوب..!
انا مابجيب سيرة الجنوب.
الغبّوا عرفوهو
والعرفو سوّوهو
والسووا بلقوهو ..
......
أصبحت زي الزول
قادل بوسط السوق
سروالو نصلوهو
لو العِرق مسروق
أو قلبي نشلوهو
طعم الكضب مسلوق
ماسخ تضوقوهو
لو فمي ما مطلوق
أو كمي غسلوهو
ياني البسوي القوق
قولي البتابوهو
ماعندكم دمي
ما عندهم دمي
من دمي لا لا لا
ماقدروا فصلوهو.
وانا ما بجيب سيرة الجنوب..
الرجوع الى أعلى الصفحة اذهب الى الأسفل
NIZAR
عضو نشط
عضو نشط
avatar

ذكر عدد الرسائل : 1187
تاريخ التسجيل : 04/03/2008

مُساهمةموضوع: رد: (وناسه)الوحده والانفصال   الثلاثاء 28 ديسمبر - 23:43

(2)
وانا ما بجيب سيرة الجنوب..
قول استقلْ ..
انا في صفوف الزوق
واقف مع الواقفين مزنوق بهنِّيهو
ويهنوهو
أواستقال ..
ودا أول الأحزان
أو قالوا باعوهو
ودا ياهو قطِّيع القلوب
أنا ما بجيب سيرة الجنوب،
فالسيرة كمين ألف عام
لوني المحرق مندوكور
وشكلي شكلين
شكل منقة
وشكل تور
دمي المشتت من قبايل نوح وحام
شعري المقرقد زي حصايا
اتشتت فوق الدروب
كتفي المهدل بالعيوب
وانا ما بجيب سيرة الجنوب
أصل البقت
من ساس وسايس أو يسوس
ياها البقت
خلونا من حرب البسوس
الفاضلة
تكفير الذنوب
الفاضلة لمليم البشاتن
والمعاطن
والخبوب
الباقي
مايخموكا تاني على
الدفافير والكناتر والحروب
الباقي تعظيم التماسك
في الخطوب
لا نافع الشَّدة العلوق
ولا نافع المبقوص يحوق
لا بنفعك عَرَق الزنوج
ولابرقعك لبن العروب
إلا الوقوف ألفاً ضكر
واحد براك
في الشيمة تلفحك الهبوب
الغيمة تديك
للسفاسف
والعواصف
والمطر
برطع مع الأفعال
وادخل على التاريخ
يغلب أجاويدك
من قرقريب عوسك
اخرِج من التاريخ
شيخك وعربيدك
لا نافعك التكفير
ولانافعك التوبيخ
فامشيه وحيدك
وامرق على التاريخ
تلقاه في السهلات
مستني كمسيدك
لا بيظلم التاريخ
ولا يرحم التاريخ
إياه عوس ايدك.
والأرض موقوت القنابل
في الحدود
والأرض منهبة الثعالب
والطحالب
والجيوش
باليوناميد
واليوناميس
والفُرقة بينات القبايل
والشتايم في المنصات
والشراكة الفي
المكايد
والخناجرفي الحناجر
والمنابر ..
آه من تلك المنابر،
إنداية كرتلة وبنابر
والجرايد
داقة طارات المدايد
الصَدَق في الناس كذوب
الساسة نِيّام العسل
بين انتباهة
وغفلتين
بين السلاطين والحبوش
والشلاتين
والقرايب
فين حلايب؟
واللي بنى الأرض كان في الفرض سوداني
عيني عليها
اتمزعت
حتة في قلبي
وحتة ف غصتي .. تاني
آدي اسرائيل في النيل
بكِّيني ولعبطني
والنيل أدنداني
إحنا حبايب في الطيّبة والآه؟
آ.
غنيلي ورقصني ؟
طيب.
بسِّ سمعني آه الآه في وداني.
***
أنقد السُقا وما بينصلح وكَّايو
وانكشح اللبن ما بينفعِن بكَّايو
بعدن بى الدروب مابقصِّرِن تكَّايو
والشاكي النقاص ناقص قمح شكَّايو
***
الرجوع الى أعلى الصفحة اذهب الى الأسفل
NIZAR
عضو نشط
عضو نشط
avatar

ذكر عدد الرسائل : 1187
تاريخ التسجيل : 04/03/2008

مُساهمةموضوع: رد: (وناسه)الوحده والانفصال   الثلاثاء 28 ديسمبر - 23:45

(3)
انا لا بجيب سيرة الجنوب
ولا أكلوني
إذا ما أكلو التور الأبيض ..
(الأرض في الجزيرة)
وبدر الله فوق سماهو
يا ساسا يابساحوتة
مكوار حبس مياهو
عطشت قبايل ابقوتة؟
البودة في خلاهو
والأرضة في بيوتا؟
الزول رِبَت كلاهو
سمينة بي مقوتا
يا تمت المعاهو
أو خلصت الحدوتة
وانا لا بجيب سيرة الجنوب
ولا أكلوني
إذا ما أكلو التور الأبيض ..
***
يدر الله يابسلوكة
سلوكة الجزيرة
كل يوم فينا بتنتش
سكك الحديد بي كم؟
بي كم بيت المفتش؟
والبيع بيعة عدوكا
بعت الأرض بترابا؟؟
باكر تبيع أبوكا
وان مُتْ من تُخمة باكر
ناس الشرق يبكوكا
وناس الغرب يبكوكا
ناس الشمال يبكوكا
وناس الجنوب يبكوكا.
وانا لا بجيب سيرة الجنوب
ولا أكلوني
إذا ما أكلو التور الأبيض ..
الرجوع الى أعلى الصفحة اذهب الى الأسفل
NIZAR
عضو نشط
عضو نشط
avatar

ذكر عدد الرسائل : 1187
تاريخ التسجيل : 04/03/2008

مُساهمةموضوع: رد: (وناسه)الوحده والانفصال   الثلاثاء 28 ديسمبر - 23:49

(4)
حمدتكم بالجاية
والجاية فوق الجاية
وعسكري الجباية
قلبو الحجر اللداية
***
بشرتكم بالسادة
والسادة بعد السادة
وجرادة فوقا جرادة
من دوكة لام كدادة
***
حمدتكم بالواقعة
والصاقعة جنب الصاقعة
مقدودة مالها راقعة
والدمعة صابة وناقعة
***
بشرتكم بالتوية
والصبنة لي الدامبوية
في الحلة دي ام كدوية
ما تقعدوا شدرة موية
***
والأرض لا حليوة
ولاها دي الجزيرة
الأرض أمات الحنين
لو نقط الضحوي البريق،
في الحين تبتق شهوتِن.
تحبل
كما الأمات
وتشرق بالوحم
لو تسعة الميلاد بتمرق بالسنين،
أو دي الشوارع بالبنات متحينة،
ترسل تراتيل الخروج في يوم
وتقطع سرتِن.
الأرض تعريف الهديل
هدل الحمام بشري
وشوق السلام انسان
بالحيل بيعرف أنَّتِن
والأرض شافت
إلا خافت
من عيون الليل
تناجي حبيب
غريب في الليل
وتفرز غنوتِنْ.
زي بذرة في جوف الأرض
أو ضحكة عند طرف القلب
بتغني لو جات في العيون
والضحكة لاقت مرقتِن
الأرض منصوص الضمان
حضن أمك الدافي وأمين
ريحة حبيب
جاياني من شمة حبيبتي وكرفتِن
لو جاتا في يوم الهموم،
في الحين تزغرد فرحتِن.
أو حرقصت فوقها السموم،
باكر تهبهب نسمتِن.
والأرض ما بتعرف تنوم
ترتاح
وغابت جمتِن
بس تدِّي مدين للعديم
بالمدة تحفظ ذمتِن
***
هن مارقات خلاهِن
ما مارقات بَراهِن
لي بصاص حِداهِن
إو قصاص بِراهِن
هن مارقات تراهِن
تريانات تراهِن
الخوف ما حَماهِن
من شوفة حِماهِن
طمانات جناهِن
بي لبنا معاهِن
يوم الشينة جَاهِن..
مرقن ليهو جَاهِن
بالعز المبطَّر
والزوق الشَفاهِن
لا حايدات مداهِن
لا قايدات عماهِن
وما كشحن بلاهِن
فوق زولاً أباهِن
لو الضيم رماهِن
هِنْ ياهِنْ
وما هِنْ.
***
وانا لا بجيب سيرة الجنوب
لاني زول بالمرة خايف
إلا شايف
إلا شايف
إلا شايف
***
أنا شايف المطر
يتحاشى الضهاري الراجية قولة خيرا
وانا شايف المطر
يمشي على الصحاري تلمو في بشكيرا
وانا شايف العشم
يتناسى العشامى ونيما ياكل نيرا
وانا شايف النفس
تتذكر نفسها وتنسى يوم حديرا
وانا شايف البلد
الطيب جناها وقمنا في شدِّيرا
...
...
شاحدك يا كريم
لا تحصل خراب لا أرجى يوم وديرا
الرجوع الى أعلى الصفحة اذهب الى الأسفل
om ashragat
عضو نشط
عضو نشط


عدد الرسائل : 539
تاريخ التسجيل : 24/06/2008

مُساهمةموضوع: رد: (وناسه)الوحده والانفصال   الخميس 30 ديسمبر - 17:26

Abdlwahab كتب:
والله فعلا يا ام اشرقت

يسرنى مرورك ويسعدنى انكم فهمتو مااقصد
جميعنا اجمعنا انه مانفعلهو الفضائيات (وناسه) في الزمن
بدل الضايع
وتدليل على تذكرك الرواية انا ماقريتا لكن شاهدتها فيلم
وهو توثيق حقيقي توثيق وياهو الحاصل
اليوم بس حنبكي ؟ الى الابد الحسره والغصة حتى في حلوقنا
بس ربنا يكذب الشينه .... لو في احساس بالتغيير وانه الحال بنصلح لاهل الجنوب
انشالله مايحصل انفصال لكن لو حيكونو كما هم اكتر اهل السودان فقرا" ومرض
ووو ربنا يبارك ليهم في ارضهم وهنيئا" ليهم بدوله مستقله


عن رعونة ساستنا وتصريحاتهم الواقعه هبطرش هل سمعت اخى عن جهل
اوصال الترابي؟؟؟ صرحت بانه فلينفصلو لو عايزين حنغير اسم البلد
اصلا انا ماعاجبني اسم السودان لانه كيف نسمى مكان علي لون البشره
بالله شوف الجهل؟؟
هل يعقل في القرن دا في جهل بالصوره الرهيبه دي؟
وبتعلن وتتكلم كمان
دا نموزج عنصريه لن تنتهي وكانها لونها هي ابيض
او خلاص(جدها النبي)(ص)
احتى السودانى اللونو ابيض سودانييييييي ولو ليس امتياز ابدا
مافي داعي ندخل في مغالطات
لكن لعنة الله على الظالمين
الرجوع الى أعلى الصفحة اذهب الى الأسفل
om ashragat
عضو نشط
عضو نشط


عدد الرسائل : 539
تاريخ التسجيل : 24/06/2008

مُساهمةموضوع: رد: (وناسه)الوحده والانفصال   الخميس 30 ديسمبر - 18:01

ياابو اشرقت غلبني اقتبس اي جزء
فكلها محتاجه يدرسوها في المدارس
وبعد دا القدال قال (انا مابجيب سيرة الجنوب)


امس سمعت حوار في ايبونى يضم ناشطين من واشنطون
جنوبيين وشماليين فاحد الجنوبيين وهو رئيس الجالية السودانية(الجنوبيه) في واشنطن
قال بنسمع الشماليين بقولو الجنوب جميل وحلو ووو ليه مايقولو انسان الجنوب
وكم تأثرت بالجمله دي وفعلا دا الحاصل
ليه مابدرسو في المدارس محبة الاخر وليه مابدرسو تعريف العنصريه وعنها
وكيف هي بغيضه وكلمة كبيره والافعال البتجي من وراها
وليه مايعلمو الاطفال كيف نحب هويتنا ولونا ونعتز بكوننا سودانيين بعيد عن القبيله
وحكاية انا جعلي وانا شايقي دي وبدل مانطور في الشمال (بس) ننمى الجنوب كمان

وشايفه (الحلب )المابخافو الله سيدهم ديل واعنى المصريين من زممممممن
بتلصقو في الجنوبيين

لنا عوده
شاحدك يا كريم
لا تحصل خراب لا أرجى يوم وديرا
الرجوع الى أعلى الصفحة اذهب الى الأسفل
om ashragat
عضو نشط
عضو نشط


عدد الرسائل : 539
تاريخ التسجيل : 24/06/2008

مُساهمةموضوع: رد: (وناسه)الوحده والانفصال   الثلاثاء 4 يناير - 18:32



بلغة بسيطه وحسابات ابسط

لو كل ناس قالو عايزين ينفصلو
ودا ممكن يحصل لاننا كسودانيين عندنا (حاكو حاكو)دي
ناس الغرب شافو الحكومه هدأت الجنوبيين وخلتم يحكمو بلدهم
اتمردو وقالو هم زاتم عايزين اها بعد الجنوب ينفصل الخوف يقولو برضو عايزين
واهلنا في الشرق يقومو تاني ...
يعني غايتو
بس ربنا يعين
الرجوع الى أعلى الصفحة اذهب الى الأسفل
om ashragat
عضو نشط
عضو نشط


عدد الرسائل : 539
تاريخ التسجيل : 24/06/2008

مُساهمةموضوع: رد: (وناسه)الوحده والانفصال   الثلاثاء 4 يناير - 18:40

قبل عام او اتنين سفراء من الامم المتحده ناس جورج كلونى و(ربعه) زارو دارفور
وكان لزيارتم عظيم الاثر
مالو لو فنانينا مغنيين وممثلين وتشكيليين في الزمن بدل الضايع الكم شهر الفاتو ديل
مشو .... كان ادثو فرق ...فالفنان السوداني مطلع وعلي درايه بماحوله واخر شي مشاركة
الفنانين في انتخابات السودان الماضيه كان ليها اثر كبير جدا
لو اتحدو مع اتحاد الفانين الجنوبيين (سمعت بيهو ) قبل ايام كان مالو ؟
حتى لو بتوجيه من الحكومه ... كان ممكن تكون اختبار للوطنيه لانه في اللحظات الحاسمه دي
مافي حزبيه غير سودانيتنا

قلبي علي وطني

الرجوع الى أعلى الصفحة اذهب الى الأسفل
إلفة
عضو نشط
عضو نشط
avatar

عدد الرسائل : 262
تاريخ التسجيل : 13/04/2008

مُساهمةموضوع: رد: (وناسه)الوحده والانفصال   الخميس 6 يناير - 17:55

صديقتي العزيزة أم أشرقت .....
أشاركك العزاء وكل السودانيين والنواح على بلدنا المقتول علنا ومع سبق الاصرار والترصّد !!!!
ليس لنا سوى أن نقول حسبنا الله ونعم الوكيل ... حقا لا أجد من الكلمات والتعابير في هذه المحنه أنسب
من كلمات كاتبة وجدتها صدفة فى موقع (الفيس بوك ) إسمها رفقه طيفور ... أحسست بألم حقيقى وأنا أقرأ ماكتبته فأستأزنك بنقلها هنا...... ولتكتمل الصورة ( حأحاكيك يانزار وأشرح الصورة ) لانها كانت تضع مع كتابتها صورة لخريطة السودان (غير مكتمله ) آآآآآآآآه فهذه وحدها مأسأة عندما تنظر الى الخريطة وهى مبتوره من نصفها الأسفل !!!!!!!!!!!!!!! هل هكذا سنرسم خريطة وطننا ؟؟؟؟؟ .............. فلأدعكم مع (خواطر رفقه ) :


رأيته في الخريطة...كان يرتدي (الميني جيب)..راعني المنظر وأثار حفيظة نفسي...كوني اعتدت عليه محتشما... يلبس الفضفاض الذي لا يصف ولا يبين...ويسدل ثوبه الى أخمص قدميه..

اليوم بدا غير محتشما !!!
حاولت التلاعب بخطوط الطول ودوائر العرض دون ان ينتبه أحد كي أستر عورته المرئية..وأسدل شيئا منه على المكشوف منه..وبينما انا أجرجر الدوائر والخطوط وانحني عند ساقيه العاريتين قال لي...
لا تتعاملي معي بهذه الفظاظة..لم أختر هذا اللباس لنفسي ..لقد ألبسني إياه القواد...أرادني أن أبدو أكثر إغراء
قلت: ومنذ متى وأنت تصاحب القوادين..
قال: مذ صرت وطنا (ي.....) حكامه...يقضون معه ليلتهم (فترتهم الرئاسيه)...يستبيحون مواطن العفة والجمال فيه..ثم يتركونه صفرا
الكل فعل معي ذلك...
اليوم يريدني القواد أن أبدو أكثر إغراء..فهناك من سيشتري...في عتمة الليل ..
قلت: لم أكن ادري أن الأوطان ترتكب الموبقات؟؟
قال: وهل للأوطان أرادة في وجود ركب خانع مثلكم؟

-------
هل من مجيب على السؤال أعلاه ؟؟؟؟؟؟؟؟؟
رايكم شنو بالله ماشي بيخنق!؟

الرجوع الى أعلى الصفحة اذهب الى الأسفل
إلفة
عضو نشط
عضو نشط
avatar

عدد الرسائل : 262
تاريخ التسجيل : 13/04/2008

مُساهمةموضوع: رد: (وناسه)الوحده والانفصال   الخميس 6 يناير - 18:03

اقتباس :
وشايفه (الحلب )المابخافو الله سيدهم ديل واعنى المصريين من زممممممن
بتلصقو في الجنوبيين

ولمن أقول ليك مابطيقم الجماعه ديل بتقولى لى شنو مابعرف !!!!
الرجوع الى أعلى الصفحة اذهب الى الأسفل
Gawasma
عضو نشط
عضو نشط
avatar

ذكر عدد الرسائل : 506
تاريخ التسجيل : 10/10/2007

مُساهمةموضوع: رد: (وناسه)الوحده والانفصال   الخميس 6 يناير - 19:14

إلفة كتب:

[color=brown][b]هل من مجيب على السؤال أعلاه ؟؟؟؟؟؟؟؟؟

لا أظن يا إلفة أن أحدا لديه إجابة !! فقط الكل الكل لديه القدرة على ( الفرجة ) و ( اللامبالات ) و ( الاتكالية ) ..
( عايزة الحق ؟ ).. نحن شعب ( متفرج ) ( غير مبالي ) ( اتكالي) بصورة أو بأخرى تعودنا على هذا يا إلفة .. حتى لو تخيلنا ( كيف يكون الحال لو ما كنت سوداني وأهل الحارة ما أهلي !! ... ) ( أهل الحارة داخل القبيلة والقبيلة فقط ) حتى لو تغنينا ( يا شعبا لهبت ثوريتك ) ثورات متفرقة .. يائسة .. في محاولات للإصلاح .. واختزلنا السودان .. السودان كلة في العاصمة .. حيث تبدو أطراف الوطن وكأنها ليست معنية بذلك .. تماما كما يحدث الآن ..

أضاعوه وأي وطن أضاعوا .. وطن يمتلك مقومات أن يكون أفضل الأوطان لو أن اهله ( عربا وعجما ) استخدموها وطوروها .. لو أن النخبة التي حكمت السودان على مر العصور تجاوزت الاضهاد والظلم والتهميش لأبناء وطنها ، لو أنهم علموا أنهم يحكمون قارة وليست مقاطعة !! لو أنهم عرفوا أن التنمية البشرية هي أساس كل نهضة وتطور وتوحد ( وطن ساسته يهمشون سكانه وولاياته .. وهم أنفسهم فرقاء متشاكسون في وطن يتربص به الأعداء من كل حدب وصوب .. ) ..

القادم أسوأ .. ..ضاعت الإلفة .. يا إلفة .. كما ضاعت حلاوة عربي جوبا ..
ولا حول ولا قوة إلا بالله العلي العظيم


الرجوع الى أعلى الصفحة اذهب الى الأسفل
Gawasma
عضو نشط
عضو نشط
avatar

ذكر عدد الرسائل : 506
تاريخ التسجيل : 10/10/2007

مُساهمةموضوع: رد: (وناسه)الوحده والانفصال   الخميس 6 يناير - 19:43

om ashragat كتب:
قبل عام او اتنين سفراء من الامم المتحده ناس جورج كلونى و(ربعه) زارو دارفور
وكان لزيارتم عظيم الاثر
مالو لو فنانينا مغنيين وممثلين وتشكيليين في الزمن بدل الضايع الكم شهر الفاتو ديل
مشو .... كان ادثو فرق ...فالفنان السوداني مطلع وعلي درايه بماحوله واخر شي مشاركة
الفنانين في انتخابات السودان الماضيه كان ليها اثر كبير جدا
لو اتحدو مع اتحاد الفانين الجنوبيين (سمعت بيهو ) قبل ايام كان مالو ؟
حتى لو بتوجيه من الحكومه ... كان ممكن تكون اختبار للوطنيه لانه في اللحظات الحاسمه دي
مافي حزبيه غير سودانيتنا
قلبي علي وطني

وين ناس خلف الله .. يا أم أشرقت ؟؟ صحي والله وينهم من موضوع الوحدة ؟؟
الجماعة ( أي أهل الفن ) مشغولين بأماسي الخرطوم الموسيقية !!!

وواضح يا أم أشرقت أن الحكاية مطبوخة بمباركة جماعة شمال الوادي الما بطيقهم إلفة ولا بنطيقهم .. وبمباركة العاربة والمستعربة والفرنجة .. وما تصريح عمرو موسى في جوبا عنكٍ ببعيد .. والحائمين الآن في شوارع جوبا ومدن الجنوب للتأكد من أن جميع اللافتات تحض على الانفصال وما خفي كان أعظم ..

تخريمة :
- رايت يوم أمس تقريرا لقناة الجزيرة من أحدي مدارس أطراف الخرطوم .. لطلبة وطالبات من الجنوب ومن الشمال .. كان التقرير مليئا بالمشاعر الطفولية الحزينة المعبرة ..
- لقد حدث ما حدث .. ولا يجدي البكاء .. و للسودان رب سيحميه و يستر عورته بالمخلصين والمؤمنين والمستنيرين من أبنائه ..
- هذا البوست يدل على وعيٍ و حسٍ عالٍ بالمسئولية من قبل صاحبته .. فلها الشكر ..

الرجوع الى أعلى الصفحة اذهب الى الأسفل
إلفة
عضو نشط
عضو نشط
avatar

عدد الرسائل : 262
تاريخ التسجيل : 13/04/2008

مُساهمةموضوع: رد: (وناسه)الوحده والانفصال   الخميس 6 يناير - 21:31

قواسمة لك تحياتي ... أولا
وأحر التعازي ... ولكن مهلا أحقا نحن نودّع الجنوب بل نشيعه ؟؟؟؟؟
بالرغم من (بيت البكا الملمومين فيهو دا ) الا أن هنالك بصيص أمل يحدوني فى أن نستفيق من الكابوس وأن تأتى الأيام القليله القادمات بما تشتهي السفن ..... قولو يارب وماف شى بعيد على رب العالمين .....


( لو أنهم علموا أنهم يحكمون قارة وليست مقاطعة !! ) ياالله .............. ليتهم حقا ليتهم علموا ....

ولكنك قلتها وللأسف صدقت فــــــ (( وطن ساسته يهمشون سكانه وولاياته .. وهم أنفسهم فرقاء متشاكسون في وطن يتربص به الأعداء من كل حدب وصوب .. ) .. ألا يعي هؤلاء ؟؟؟؟؟؟؟؟؟؟؟؟؟؟؟؟؟؟؟؟؟

ياإلهي ................. كيف هو هذا القادم الأسوأ ؟؟؟؟؟





الله يستر .

الرجوع الى أعلى الصفحة اذهب الى الأسفل
إلفة
عضو نشط
عضو نشط
avatar

عدد الرسائل : 262
تاريخ التسجيل : 13/04/2008

مُساهمةموضوع: رد: (وناسه)الوحده والانفصال   الخميس 6 يناير - 21:42

( - هذا البوست يدل على وعيٍ و حسٍ عالٍ بالمسئولية من قبل صاحبته .. فلها الشكر .. )


.....صح لسانك ياقواسمة ودا شي مؤكد ... أم أشرقت دايما مواضيعا هادفه والله ..
أضم شهادتي إلي شهادتك ...

وشكرا بالنيابه عنها :):):) ... (رايك شنو ياأم أشرقت فى اللفحي دا ههههههههههه)
الرجوع الى أعلى الصفحة اذهب الى الأسفل
om ashragat
عضو نشط
عضو نشط


عدد الرسائل : 539
تاريخ التسجيل : 24/06/2008

مُساهمةموضوع: رد: (وناسه)الوحده والانفصال   الجمعة 7 يناير - 1:57

الفه ياصديقتي تعالي اقااااالدك واعزي لانه فعلا مافي مايعبر عن المحنه

كلامك 100% وعجبني قولك انه وطنا مقتول علنا" ومع سبق الاصرار والترصد
بس القاتل ماامريكا رغم سعيها وسعي الكتيرين القاتل الحقيقي نحنا حكومه وشعب
بالعنجهية والتكبر والعنصريه والجهل المصاحب لكل مااسبفت زكره بيه نبقي شلنا سكين
ونحرنا السودان

اما عن اقتباسك فساتيه بالتفصيل
فهو في محله وكلنا نعلم من استباح حرمة الوطن
ولكن اضعف الايمان (حسبنا الله ونعم الوكيل)
الرجوع الى أعلى الصفحة اذهب الى الأسفل
om ashragat
عضو نشط
عضو نشط


عدد الرسائل : 539
تاريخ التسجيل : 24/06/2008

مُساهمةموضوع: رد: (وناسه)الوحده والانفصال   السبت 8 يناير - 17:38

سلامات اخوي اقواسمه
و قلت الحقيقه والله الكل لديه المقدره علي الفرجه والاتكالية واللامبالاة
لكن البفهم والبعي منو

من قمنا ووعينا كرهونا وغسلو ادمغتنا وعمو عيونا عن حقايق كتيره
منها ان الامريكان (مرضتنا) انهم كفره وظالمين وزنادقة وكذابين
وافاكين وجبارين وووو
الكفره ديل لما يخفق احدهم بقول انا اخفقت والضميرو ميت خلاص وماقدر
بستقيل والضميرو انبو شديييييييييد بشيل مسدس وبضرب نفسو
موش ياريتنا زيهم علي الاقل بعترفو بغلطهم وبقرو بزنبهم وبحاولو يصلحو
ونحنا نشيييييييييل ونفرتق موش نقول (ليتهم بمثل نزاهة هؤلاء)


وليس ساستنا وحدهم جميعنا تعلمنا ان نهمش الاخر بروح القبليه
البغيضه وان هناك قبيله احسن من الاخرى

وصدقت ...
فلو عملو وعلمو بان الاهم هو ان يستثمر(الحاكم) في (البشريه) المتنوعه التي يملكها
هي الاهم وعمل عليها ... علي توحيدها واذالة مايهدد (احساسها) بانتماءها لوطنها
وعمل علي تأكيد سودانيتها ... وليس بأن نلبس زيهم ونحن نحسسهم باننا اتنازلنا
ولبسنا (لبس) الغابه دا ... ماكان وقفنا الموقف دا ... لو استفدنا من تجارب غيرنا
وشلنا البفيدنا ورمينا الباقي

الرجوع الى أعلى الصفحة اذهب الى الأسفل
NIZAR
عضو نشط
عضو نشط
avatar

ذكر عدد الرسائل : 1187
تاريخ التسجيل : 04/03/2008

مُساهمةموضوع: رد: (وناسه)الوحده والانفصال   السبت 8 يناير - 18:49


التحيات النواضر يا جماعة
يا اخوانـّـا خلاص، من بكرة السودان بلا جنوب، والحاضر يكلم الغائب.
تعالوا نتمنى لدولة الجنوب (الشقيقة) السؤدد والاستقرار، وان شاء الله الزول أبو برنيطة ده ما يلحقهم أمـّـات طه، زي ما لحـّـق رفيقه في النضال جون قرنق في حادثة الطائرة الاوغندية... وإن شاء الله الأميركان يوفوا بوعودهم للبشير، ويا ما وعدوه قبل كده وزاغوا منه. (الخوف، بعد ده، يختـّوا ايدهم في يد أوكامبو).. الله يستر!
من بكرة (الأحد).. السودان بلا جنوب. ولن تجدي أي دموع تُذرف لتغيير هذه الحقيقة التي باتت في مكمن قبضة اليد. الجنوب سيصير دولة جارة .. الله يكفيهم شرنا، ويكفينا شرهم.
الرجوع الى أعلى الصفحة اذهب الى الأسفل
om ashragat
عضو نشط
عضو نشط


عدد الرسائل : 539
تاريخ التسجيل : 24/06/2008

مُساهمةموضوع: رد: (وناسه)الوحده والانفصال   الأربعاء 12 يناير - 16:57


صباحاتكم ...

خلاص حانت اللحظه الحاسمه واتوجهو للصناديق
وجدودنا زمان قالو هيا ياشباب ضمو الجنوب
واظنها فرقة لن يكون بعدها تجميع

عن الصورة
ملتقط الصورة اظنه قصد انه ولا واحد في (الريسين) مامثبت قدمو في الارض
ومامعروف ماشين وموديننا معاهم لياتو (هاويه)
ولا ياتو (كوشة)


الرجوع الى أعلى الصفحة اذهب الى الأسفل
الزعيم
عضو نشط
عضو نشط
avatar

عدد الرسائل : 269
تاريخ التسجيل : 14/10/2010

مُساهمةموضوع: رد: (وناسه)الوحده والانفصال   الأربعاء 12 يناير - 19:46

وان كانت وجهة نظرى تختلف عنكم
احساسى العميق ان النتيجه ستكون لصالح الوحدة وباسس جديدة فى الحياة السودانية ان فكرة انشاء الحركة الشغبية 1983 بقيادة جون قرنق واجتماعاتهم لمدة سبعة اشهر ووضع فلسفة الحركة الشعبيه لتحرير الجنوب تم تغيرها الى الحركة الشعبية لتحرير السودان ولما لا يحكم اهل الجنوب السودان باكمله انطلقت الحركة وظهور الانفصاليين يقيادو وليم نون الذى تم تصفيته لانه انفصالى ولا يتماشى مع اجندة الحركة الشعبيه لتحرير السودان
والمطالع للامور جيدا فى الحياة السياسية بان الحركة الشعبية من قوة متمردة الى حزب سيلسى ولم لا يحكم السودان وتلك هى الطموح الذى بدات به
اتفاقية نيفاشا اتت بتقرير المصير على ان يكون فى 9 يناير 2011 عند توقيع الاتفاقية 9يناير 2005
ولكن هناك اجندة اخرى خفية وهى وحدة السودان ترابا وشعبا وتم الاشارة لها (( بالوحدة الجاذبة))
ولكن تدخل الاجنبى فى الاتفاقية واتت الدعوة للانفصال من غير ادراك او وعى لان المرحلة التى يمر بها الجنوب اصعب من فترة الحرب التى عاشها الجنوب 50 عاما
البترول ليس هو الهدف الاساسى لان الجنوب كان يعيش على الشمال والان لا مصدر دخل وحتى البترول مثل نهر النيل من اعلا الى اسفل اذن التكوين الجغرافى لا يشير الى الانفصال والحركة الشعبيه قبل اعلان النتائج ستكون هناك لقاءات ومشاورات بين الحكومة والحركة بالاجندة الخفيه التى سيتوافق عليها الحكومه ومنها تظهر نتيجة الاستفتاء وحدة وليس انفصال
خاصة الان امريكا تلوح بسحب السودان من قائمة الاهاب لان الحومة القادمة للسودان مليون ميل مربع برئاسة رئيس جنوبى على ان تجرى انتخابات كل خمس سنوان لرئيس الجمهوريه والى اعضاء البرلمان لكل اهل السودان شمالا وجنوبا شرقا وغربا// والجالية السودانية بالكويت احتفلت باعياد الاستقلال المجيد الجمعة 7 يناير 2011 ورفعت شعارا الجالية السودانية بالكويت تهنئ الشعب السودانى شمالا وجنوبا شرقا وغربا باعياد الاستقلال المجيد ايمان منها بوحدة السودان
والاسم الجديد الى جمهورية السودان الولايات المتحدة السودانية
الرجوع الى أعلى الصفحة اذهب الى الأسفل
 
(وناسه)الوحده والانفصال
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
الملتقى الحر للسودانيين بالكويت :: الملتقى العام-
انتقل الى: