مع كل الود والتقدير...

في البداية كل عام وانتم بخير
مع كل الود والتقدير برنامج تلفزيوني (تصنيفه) من برامج(الواقع) وال(واقع) شديد(وداقي الدلجة )برنامج ملفت ومهم ونال اعجاب المشاهدين من اول سنة يعرض فيها وحتي الان
وكم زرفنا دموعنا وكم تأوهنا مع المستضافين
من فتحو اعيننا علي (السودان التاني) غير سودان ( اثاث الفايز و هلا )
فتح عيونا علي الناس التحت ... وهم كثر .. والعايشين وبقتاتو بـــ (الحمدلله)

نعم الحمدلله رب العالمين علي نعمه علينا الحمدوالشكر لله

لي عوده

برنامج ضخم وامكانيات (ممتازه) ان لم تكن ضخمه
ولكن في البداية والنهاية يظل برنامج تلفزيوني وليس ب(دولة)
ولا بيت زكاة... ولا (اوبرا وينفري) عشان تدي الجماعه كلهم عربات
لانهم مساكين كادحين طولو ماغيرو عرباتهم او ماعندهم وبجاهدو في سبيل تسديد الفواتير

برنامج متل مع كل الود والتقدير جديد علينا كسودانيين ... كلنا شاهدنا اوبرا وغيرا واتفاعلنا معاهم
لكن ان تأتي فضائية هي مننا (سودانية) وتفعل مافعلته الشروق في راي واعتقد رأي كل المشاهدين انها حاجه عظيمة .. انشالله في ميزان حسناتهم

برنامج مع كل الود والتقدير ماجديد كفكره ... ابدا" كلنا شفنا اوبرا وغيرها غيرو حيات الاف الاشخاص
واتفاعلنا معاهم ولسان حالنا بقول ياريت لو مسلمين ... لانهم بعرفو معني التكافل جددددددا
اما عنا كسودانيين فالبرنامج جديد علي شاشاتنا ... ورغم عظمة مايقدمونه الا انهم في النهاية فضائية
عايزة اعلانات تتكسب بيها ... يعني مهما كان (جمال الوالي) (ربنا يزيدو) فهو ليس باوبرا ... توزع عربات علي الاف الاشخاص عشان مساكين مكافحين من اجل تسديد الفواتير وطولو ماغيرو عرباتهم او ماعندهم
البجيبوهم في البرنامج دا بيقولو مرات اليوم كلللللللللو مابياكلو( مالانهم عاملين رجيم) لانه ماعندهم
وعندهم اطفال ... مع الفقر تجد المرض ساكن فيهم ... يعني كل حاله اصعب من التانيه

سؤال

وين

ديوان الزكاة
الرعاية الاجتماعية
وزارة الصحة
والتربية والتعليم

من البرنامج دا؟

اذا كان المساهمين بقومو بحالة فرد مفروض احدي هذه الوزارات تتولي عدد اخر
لانهم كثر .... بس (تجدهم اغنياء من التعفف)

تنوية
الرد التالت كتبتو لانه التاني مالقيتو وهسي بقدرة قادر ظهر
يكون الملتقي مسكون

اود ان اشيد بهذا البرنامج لانه مواعيد بثه كل الفضائيات السودانية غنا وهجيج
الا الشروق .... تفتح الشروق سبعه ونص تعزي وتستغفر

المزيعه رانية هارون ابلت حسنا ودي تجربتا الاولي مع البرنامج العام الاول كان الطيب عبدالماجد
والسنه الماضيه كان تقرير فقط لاغير دون وجود مقدم وحاليا رانيا كنوع من التغيير
ودي استراتيجية القناة او ادارة البرامج بالقناة علي مااظن

المهم

الوجع الفي البرنامج يخلي اصحاب المليارات السودانيين يدقو صدورهم ويقولو
نحنا القالو فينا (حتي الطير يجيها جعان من اطراف تقيها شبع)
وبدل شعارات وغنا ونأكل(في الطير) نأكل الناس المالاقيه تاكل

وجعي علي وطني

ياسلام والله دي طلة بس وبجي أشاركك (الوجع على الوطن ).....

مبدئيا الحتة دي عجبتنى شديد : وبدل شعارات وغنا ونأكل(في الطير) نأكل الناس المالاقيه تاكل
يديك العافية والله في وكريم على المساكين وكل عبادو..

خوفي نبقى بياعين كلام وغنا بس زى ناس كدا !

خوفك نبقي ... يابتي بقينا

رسلنا طيارة لاغاثة ناس باكستان وناس النيل الابيض وشندي بقينا نشحد ليهم
اها دا اسمو شنو