إيميل ظريف ! إنت ليه ما بتمسك أيدي و نحنا طالعين سوا ؟

مميز عدد الرسائل : 2317 تاريخ التسجيل : 10/10/2007

مجكسين(1)
'إنت ليه ما بتمسك ايدي واحنا طالعين سوا؟'
'‏لأ طبعاً يا روحي... أفرضي زول من اهلك شافنا؟ ولا واحد من أهلي؟ على الاقل كِده بنقدر نزوغ من الزرزره, لكن إن ‏شاء الله يا حبيبتي باكر آخدك وامسك إيدك قدام الدنيا كلها '.
...................................
مخطوبين (2)
'إنت ليه ما بتمسك ايدي واحنا طالعين سوا؟'
'علشان ما داير زول يعلّق علينا ويقول الجماعة ما مصدقين انهم مخطوبين...
وبعدين
بصراحة كده أنا ما برضى أي زول يتكلم على حبيبتي...
..................................
متزوجين(3)
'إنت ليه ما بتمسك ايدي واحنا طالعين سوا؟'
'يا حبيبتي إحنا ما مراهقين عشان نقعد نمسك إيدين بعض في الشارع وكده!!....
..................................
متزوجين وعندهم عيال(4)
'إنت ليه ما بتمسك ايدي واحنا طالعين سوا؟'
'يعني امسك إيدك انتي ولا امسك إيد الشافع ولا اشيل الأكياس دي كلها، ولاّ شنو يعني؟!'
مُصيبة شنو الوقعنا فيها دي يا ربي؟؟؟
...................................
بعد 25 سنه من الكفاح المُسلـّح (5)
'إنت ليه ما بتمسك ايدي واحنا طالعين سوا؟'
'إيد شنو دي اللي بمسكها هسه بعد العُمُر ده! إنتي دايره راجل بـِتـّك يقول علينا كبرنا وخرّفنا؟!

يا وليّه أكبَري عليك الله

ياخي كتلتنا بالضحك والمشاهدات العجيبة
يبدو لي إنو السودانيين اكتر شعب في الدنيا ، بيغتغت عواطفو . خاصة عواطفو المفرحة
الواحد تلقاهو مكسّر عينو طالعة ، لكن يبدو ليك شديد المراس . عواطفنا الـ زي دي بتظهر في الكتابة اكتر شي (شعراء الحقيبة ، مثالاً) وبتختفي في مسيرة الحياة . والمجتمع بيتحمل الجزء الاكبر في الحتة دي ، لأنو بينظر للزول الفرحان بعاطفتو زي الكأنو زول عبيط .. أو مجنون في أحسن الأحوال .. كدي بس لاحظ في الحفلات : لو شفتَ ليك زول مندمج في الرقيص أكيد حتلقى زول بيوسوس : عليك الله شوف الأهبل ده بنطط كيف!!
في حين إنو عواطفنا التانية الحزينة ، ظااااهرة . ونكاد نكون اكتر شعب متجهم وصاري وشو . لو ضحكنا تلقى دموعنا جرن . ولو مات لينا زول تلقانا نستدرج الحزن من اقصى المخيخ ليظهر في سحنتنا كآبة منقطعة النظير ، رغم إيماننا الكبير بإنو الموت حق ، وهو سبيل الأولين والآخرين
إذا في اتنين بحبو بعض أكيد حتلقى واحد بيحبط فيهم ويعقدهم لغاية ما يخجلو . يشبكهم ليك : حب شنو ياخ بالاي ! شغل الشفع ده شنو هسة البسوو فيهو ده ! ها الزول العوير ده! شوف البت العينها محكوكة دي ! وهكذا . لغاية ما بقى الحب زي الشتيمة ، والتعبير عنه كما لو أنه جناية يُسجن بها الإنسان
قال ليها (يا ولية أكبري عليك الله) .. ههههههههه

مميز عدد الرسائل : 2317 تاريخ التسجيل : 10/10/2007

الأخ الحبيب نزار و الله صدقت ، أنا الشيء المستغرب ليه كده شوف عازفينا يعني مثلاً غينة الأستاذ الكبير كابلي ( سكر ) ما فيها كلمه واحده تجيب الزعل لكن تلاقين العازفين الواحد طابق كمانته و صاري تقول هسة يكسرة ، و غنية ود البادية لسه بحبه كان واحد غريب يقول الجماعة ديل هسه يقوموا يطربقوها في رأسة ، ونجي لأغاني الحقيبة وكلمات شاعرنا الفذ سيد عبد العزيز شنو قال

تقلب فيه أسما وبرضه تشوفه أسمى
كل وصف تراه أقل من مستواه
مترفع عظيم عالي بعيد مداه
ملأ العين جماله الزاهي رشح نداه
يلالي والكواكب تتناثر حداه
فيه الحسن أودع ما ملكت يداه
مفرح وشوفته تفرح
بتلقاك باسم كالزهر المنسق في زمن المواسم
تشوف في مقلتيه حياه دلاله تيه
واللحظ البجرح والوجد المبرح
أنا من دون أصرح
لي قلب اصطفاه وهسه هناك معاه

ما هو عارف وراء التصريح بتجي البشتنة ، وبعدين كده لاحظ ريدتنا للأفلام الهندية ما الوحد يخش الفلم يكب كل عواطفة جواهوا ويطلع صاري ،

نمرة أربعة دي قوية يا رفاعي ...

ماذا تقول لمن يهديك من دواخله ابتسامة أو ضحكة تغسل عنك الهموم والضجر والكآبة وزحمة الحياة
ماذا تقول لمن يضحكك حتى تبدو نواجزك
حتى تبدو دواخلك
حتى ينزاح عنك حملا ثقيلا اسمه افتئات الآخرين وتحاملهم وعجزهم
ماذا تقول لمن يهديك لحظة من ألق وطهارة ...

شكرا ود الشريف .. وجزاك الله خيرا

مميز عدد الرسائل : 2317 تاريخ التسجيل : 10/10/2007

الأخ الحبيب قواسمة شكراً يا جميل علي مداخلتك و بالله ما تحرمنا من اسلوبك الشيق ، و إتكاءت الراحة و نسائمها الرائعة