"اسمعني نشيدك" .. لعناية الأب كمبلاوي والأخ وهبة

هنا غناء يجرحُ العظمَ ، ويقسم الـ بني آدم إلى نصفين ..
لا أدري أين يكون النصف الأول ولكني متيقن من أن النصف الثاني سيكون في العناية المركزة . أنقله إليكم من موقعنا المجاور سودانيز اونلاين ، وقد تعذر عليّ نقل الأغنية وحدها (يا وهبة ما تشوف لينا حل للموضوع ده ياخ) ..

الأغنية صاحبها الأصلي هو محمد علي الأمي رحمة الله عليه .. ويقول فيها :

اسمعنى نشيدك
ورينى كمان فى الفن تجديدك
يا حمام الدوح
اسالنى افيدك
عن حالى البى واحسبنى شهيدك
يا حمام الدوح
لو ايدى فى ايدك
البس روحى ياحمام فى وريدك
اسمعنى نشيدك
اترك تهديدك
يا ساجع الدوح خلينى اريدك
سارح فى هجيدك
لو لى جناح انا كنت وازيدك
رحماك فى صعيدك
اندب حظى
وادينى بعيدك
يوم عيدى وعيدك
لو الايام لديارنا تعيدك
اسمعنى نشيدك ورينى كمان فى الفن تجديدك
يا حمام الدوح

وقد دخلتُ مشاركاً هناك بالتالي :
" لو ايدى فى ايدك
البس روحى ياحمام فى وريدك " ..

يا لها من عبارة .
تشبه الخرافات الحزينة التي ترعرعت على هامش أرواح العشاق الكبار منذ أزمان سحيقة .
وحين يحدث مرضٌ في الروح فإن الدواء هو التأمل الذي سرعان ما يعيد العاشق الى ذروة الطهر والتوهج ..
لا شيء يفسد العشق سوى الفلسفات ، لا سيما المادية منها ، التي تحدثُ ثقباً أسود في الرؤيا .
لكن الروح ليست عود ثقاب يتوقــّد لينطفئ ، إنها تتلألأ هنا كما لو أنها الصدى المحمول في وريد حمامة ..
والحمامة ـ كما رأيتها هنا ـ ليست "شخصاً " أحمق ..
إنها ذاكرة الجيولوجيا الروحية المتزلزلة بفنائها في المعشوق ،
وحيث قناديل الأزل تضاءُ تباعاً في قلب العاشق ..

أودية ، وصلوات ، وأزمنة .. في تلك السفوح التي قدتنا إليها بصوتك ، يا خدر،
وأنت تنشد واحداً من "أناشيد الزنادقة" ..
أدهشني الشعر، وأدهشني الغناء .
ولم يحدث ذلك صدفةً ، فقد كان نتاج صفقة عبقرية ، أو تقاطع عبقري ، بين النص وغنائك له بهذا التطريب المعذِّب والشجن العريض الذي أحسّه يتمشـّى في وريدي أيضاً ..

هذا "البوست" الذي أخرجني من صمتي ، كما لو أنه يدعونا إلى أن نجعل العالم عاشقاً (خاصة في السودان ، وبالأخص في سودانيز .. ) ..
وحينذاك ، لا يعود ضجيج المقابر ، ولا ضجيج الايديولوجيات المصنّـعة هو الغالب ..
بل اننا نكتشف أن أرواحنا التي أُرغمت على الأنين على ضفاف المستنقعات ، يمكن أن تقودنا ، حيناً ، إلى السنابل ، وحيناً إلى الينابيع ..

كل ما في الأمر ألا نضع أرواحنا الجميلة على الرف .
،،،
الأغنية في رابط البوست أدناه .. ارجو أن تستمتعا بها ، ويستمتع بها كل الأخوة والاخوات هنا ..
http://www.sudaneseonline.com/cgi-bin/sdb/2bb.cgi?seq=msg&board=160&msg=1207392140&page=1&pb=

نزار السمندل

يا وهبة ، تلقيت الـ sms تبعك ، ووضح لي انو غلبتك الكتابة
ما قلت ليك ده غنا يجرح العظم !!!!!

البس روحى ياحمام فى وريدك
اسمعنى نشيدك

دى بتعمل وجع روح عديل كده شكرا على هذا الاهداء الرائع

بالمناسبة غنها عوض الكريم عبدالله

كمبلاوي كتب:: البس روحى ياحمام فى وريدك
اسمعنى نشيدك

دى بتعمل وجع روح عديل كده شكرا على هذا الاهداء الرائع

بالمناسبة غنها عوض الكريم عبدالله

ياسلام عليك يا ابونا
وياريت تلقى تسجيل عوض الكريم (ذلك الفنان الغتيت)

حاحاول ادور على الشريط وانا متأكد أنه موجود

الواحد خايف من خمت النفس بس

Admin عدد الرسائل : 982 تاريخ التسجيل : 10/10/2007

والله أنا سببي بعرفو برااااي,,
لكن الأغنية جميلة ,, وانت طلعت زول نكاش
وتعليقك عليها زادها بهاءا وابهارا

كلمات إبدااااااع ،،دي ياأبو النيز بتهيج لينا الرطوبة بتاعت بورسودان lol!

Abdlwahab كتب:: والله أنا سببي بعرفو برااااي,,
لكن الأغنية جميلة ,, وانت طلعت زول نكاش
وتعليقك عليها زادها بهاءا وابهارا

أهم حاجة يا وهبة إنك تكون استمزجت الأغنية ،
واستمتعت بـ حنانها ونشيجها وتطريب مغنيها ،،
والباقي هيّــن يا صاحب ، فكلنا في معية الفقد فاتحون أكف الرجاء
وكلنا إلى هلاك .

بورسوداني كتب:: كلمات إبدااااااع ،،دي ياأبو النيز بتهيج لينا الرطوبة بتاعت بورسودان

حبابك ألف يا بورسوداني ،
وأبعد الله عنك شرور الرطوبة الـ هناك ، وزادك من مباهج الترطيبة الـ هنا Very Happy

لا تحرمنا حلو الشوفات

إمعاناً في التعذيب
نرفعها لعناية الأخ عريبي ،،،،،،،
(ولا نامت أعين الجبناء)

عارف يانزار .........
بس بدون تعليق ياخ

لو قلت ليك دي المرة العاشرة أسمعا على التوالي صدقنى ....
والله على قول كمبلاوي بالجد بتعمل وجع روح لانو دا وجع كدا مابتقدر تهبشو

الغنية سمحة شدييييييييييييييييد يانزار ( بروفات كيف ؟
عليك الله كدي ( نكّت ) لينا من الحاجات دي كتير ...
فى الانتظار نحن

إلفة ،،
شفتي الأودية والصلوات دي !
شفتي أقدار المحبة ،
وحكايات الحمام ورحلة شقاو !!
أغنية أشبه ما تكون بـ رواية عن ريدة طاعنة في السن ،،
محبة دائرية ،
كل ما الحبيب يلف ، وتشيلوا الأودية توديهو غادي غادي ، يلقى روحو بادي اللفة من جديد ..
ريدة كده ،،
زي ... الأشغال الشاقة المؤبدة ، دائماً ملفوفة بالآمال (يوم عيدى وعيدك /لو الايام لديارنا تعيدك) ،
ريدة فقدان ..
وريدة الفقدان دي ـ في نظري الضعيف ـ اشد قسوة وأرفع مكانة من الريدة الـ في متناول اليد ،
اذا كانت الريدة عمل شاق ،
فـ ريدة الفقدان دي "أوفرتايم" لأعمال الفؤاد في مماشي ريدتو وفتنتو ومجمل صبابتو

يا ربيييييييي ،،،
(لو إيدي في إيدك / ألبس روحي يا حمام في وريدك) ،،

البس روحى يا حمام فى وريدك

بقدر روعت هذا البيت وقدر ما حاولت ان اتسلق لاصل الى
قمته الشاهقة اجد نفسى لم اجد التعبير الصحيح لكن حصل

فى واحد فيكم حلم انه واقع من جبل وهذا الشعور البنتاب الواحد

والشحتفه بتاعت الروح دى الحاجه البشعر بيها لمن اسمع هذا البيت

**********************************************

والله من وراء القصد

نزااااااااااااااار القصة دي صعبة شديد
وانت عندك تعابير وتشبيهات حقتك برااااااك بالجد الواحد بيكون التعبير مرات قاعد جواهو
بس مابعرف يترجمو لأنو بيتخيل إنو قدر مايقول ماااااااياهو الشي الحقيقي الحاسيهو لكن انت ماشاء الله
عليك حفظك الله وحفظ لك ملكتك هذه وزادك إياها ..
منتظرين المزيد .. ( المزيد دى الغنا وكتاباتك الخاصة )

(ريدة طاعنة في السن ،، ) :) :) :)
لكن دا تعبير خرااااااااااااااافي ( ولا تعليق )

كمبلاوي كتب:: البس روحى يا حمام فى وريدك

بقدر روعت هذا البيت وقدر ما حاولت ان اتسلق لاصل الى
قمته الشاهقة اجد نفسى لم اجد التعبير الصحيح لكن حصل

فى واحد فيكم حلم انه واقع من جبل وهذا الشعور البنتاب الواحد

والشحتفه بتاعت الروح دى الحاجه البشعر بيها لمن اسمع هذا البيت

فعلاً شحتفة روح ، وقلق ..
قلق شديد ، لكن محسوب بعناية ونظام ،
وشجن يحنّ إلى نفسه،
ويستفسر عن أصل العلاقة بين الحمام والحب ،
وعن سرّ خفة الوزن لما تقع من جبل وتحتك الواطة عويش وشوك وجمــُـر سائل ،
وعن التراب الـ بنكندك بيهو أغاني الغريب للغريب !!
شفتَ المسألة دي غميسة كيف يا أبوي !!
الشاعر ود الأمي هنا الـ تقول ما بقول شعر ،،
بل كأنو بيسرد أنفاسو ، ويربّط شجنو بـ سلك كهربا قديم ،
وبيرطن مع الطير والصيّ وشفق الشمس الـ لاهث في امتداد الشوق للحبيبة ،وهو ماشي
ماشي ،، مااااااااااشي ،
لكن كل ما زاد المشي ، الخطوات ما بتتراكم ،
الـ بحصل إنو الدرب بنقــدّ ..
حصل لاقاكَ درب قدّاهو مشي زول فيهو !!
زول سارح بالأغاني والاشعار في فيافي التيه واللوعة الـ بتكسر عضمة القلب !!

إلفة كتب:: (ريدة طاعنة في السن ،، ) :) :) :)
لكن دا تعبير خرااااااااااااااافي ( ولا تعليق )

أيوة ، ريدة طاعنة في السن ،
شوفي زي ود الأمي ده هسة ،
زول من ماركة الناس الـ بخلو الواحدة تنعس في قلبو ،
تنعس من زماااااااااااان ،
يلوليها بين رمشو ورمشو ،
ويقعد يحلما وهو بشوفا ،
ويشوفا وهو بيحلما..
شفتي حزنو الـ في الغنية دي بالله !
ريحة حزنو لا تطاق ،
لكن ما قـِـدِر يستحمّ من حزنو ده ؛
النيل كلو ما بكفي يحممّو ..
الريدة الطاعنة في السن بتعمل عاهة في قلب سيدا ،
عاهة معتبرة،..
كل يوم يطلع راس بيت عاهته دي ، ويراقب الحمام والغمام،..
يصحو واقعيتها كل يوم، ويبلع كوابيسها كل ليلة،..
يصحو وزبد كوابيسها في يده،..
يوماً بعد يوم، وتسرقه العاهة من نفسه،..
فيضلّ في حزن العاهة ، وتضل معاو مريودتو ،
ومريودتو دي مفروض تكون من فصيلة صاحبات (الذكاء الإدراكي)
القال فيهن ود شوراني :
جيت عارق الدكاكين البُناها زناكي
رَسَنك زَاعت الوِرْدان ودومك باكي
تفاح دُنقلا العَمَتْ السبيط متّاكي
ألذذ منو ريق سيد الذكا الإدراكي

،،،،
إنا لله ، إنا لله

عارفين ده حمام حاجه ستغريب

مش زى حمام البيوت ده حمام قلابى

النوع البتشغلب فى الجو له رقصه تخلب الالباب

هديله يختلف فهو جامع ما بين القمرى والحمام

تعرفوا مره قاعد فى راس بيت من الساعه 2 بعد الظهر

لحدى الساعه 5 مساء عشان اتفرج على هذا النوع من الحمام

وللعلم هنا فى هذه البلد عندهم هوايه جميله ( تطير الحمام وهى هوايه غاليه جدا )

**********************************************

والله من وراء القصد

على سبيل التحية

NIZAR كتب:: سارح فى هجيدك
لو لى جناح انا كنت وازيدك
رحماك فى صعيدك
اندب حظى
وادينى بعيدك
يوم عيدى وعيدك
لو الايام لديارنا تعيدك
اسمعنى نشيدك ورينى كمان فى الفن تجديدك
يا حمام الدوح

[color.
http://www.sudaneseonline.com/cgi-bin/sdb/2bb.cgi?seq=msg&board=160&msg=1207392140&page=1&pb=

ونرد ليك التحية بأجمل منها

تعرف دى زى جراح المخ والاعصاب
لمن يقوليك دى جراحه دقيقة عشان
الورم ضاغط على العصب وبدوره
العصب داغط على المخ عشان كده
دى عايزه جراحه عميقه والجراح لازم
يكون فنان عشان يقدر يتفادى المطبات
زى الطيار الماهر
يعنى زى الواحد قاعدين يمصرفيهو
يعنى عمليه كركبه شديده
ولنا عوده

*****************************

انا تانهسو انا
والله من وراء القصد

» "مايكروسوفت" و"اكسبلورر ميني ماوس"
» الله يسامحك يا وهبة
» الدعوات ل ضياء كمبلاوي
» لعناية الاخ عبدالوهاب
» ألف حمدالله على السلامة ضياء كمبلاوي